National Disaster Management Authority (NDMA), Government of India leh Mizoram State Disaster Management Authoriy tangkawpin an buatsaih, kum 1897-a Shillong khawpui nuaitu lirnghing na tak 8.7 Richter Scale-a na lo thleng anga ngaiin chhiatna rapthlak thleng kara chetlak dan tur lemchanpui (mega mock drill) chu vawiin khan Aizawl khawpui chhung hmun hrang hrangah neih a ni a. He Mock Drill-ah hian Sorkar Department hrang hrangte leh tlawmngai pawlte, School leh Hospital ten tha takin an chanvo an hlen a ni.

Mock Drill hi Kulikawn Middle School, Millennium Centre, Directorate of Higher & Technical Education, Pioneer Missionary School, Zarkawt leh Hotel Regency-ah te neih a ni a. Zing dar 11:30 ah heng hmun thlan bikah te hian siren tihrik niin lirnghing nasa tak lo thleng palha awm dan tur te an entir a. Inbuatsaihna tha taka kalpui niin a tak ang thei ber turin mock drill hi neih niin phai lam mithiamte leh Disaster Management & Rehabilitation-a official te’n a hmunah an vil a ni.

Lirnghing nasa tak lo thleng chu Responsible Officer Aizawl DC Dr Franklin Laltinkhuma hnenah hriattir a nih ve leh District Emergency Operation Centre ah hrilh chhawn nghal a ni a, DEOC atang hian chhiatrupna buaipui tura ruat mawhphurtu te hrilh nghal niin chhiat thlenna hmunah tirh nghal zel an ni a. Hemi atana din Team hrang hrang ten chhiat thlenna hmunah an mawhphurhnna theuh te thawkin hliam tuar chhanchhuah hna te, building chhunga tang lakchhuah ngai te khawl chi hrang hrang hmanga lakchhuah dan te, inchhawng leh hmun sang atanga hrui hmanga hliam tuarte lakthlak dante, kangmei chhuak thelh hna te leh damlo bawihsawm hna te an thawk nghal zung zung a ni. Damlo te hi Aizawl Civil Hospital, Kulikawn Hospital, BN Hospital, New Life Hospital, Greenwood Hospital, Presbyterian Hospital, Durtlang, Bethesda leh Nazareth Hospital ah a tul anga enkawl atan thawn an ni. Hetih lai hian heng school ah te hian chhanchhuah hna thawh dan entirin zirlai ten an lo bei ve bawk a ni :-

1. Govt. Model Comprehensive High School, Model Veng.

2. Govt. Hrangchhuana High School, Salem Veng.

3. ITI Adhoc Aided High School, Chanmari ‘W’.

4. Tez Singh Gorkha Adhoc Aided High School, Bungkawn.

5. Govt. Gorkha High School, Khatla.

6. Govt. Dinthar High School, Dinthar Veng.

7. Vaivakawn Adhoc Aided High School, Vaivakawn.

8. Govt. Chawnpui High School, Chawnpui

9. Ramhlun Vengthar Adhoc Aided High School, Ramhlun Vengthar.

10. Chanmari ‘W’ Adhoc Aided High School, Chanmari ‘W’.

Vawiina Aizawla Mega Mock Drill neih rual hian Serchhip ah pawh neih a ni a, hmarchhak state dang – Nagaland (Kohima leh Dimapur), Manipur (Imphal leh Thoubal), Tripura (Agartala leh Ambassa) leh Silchar, Assam ah te neih a ni bawk a, ni 10/3/2014 khan Assam, Arunachal Pradesh, Meghalaya leh Sikkim ah te neih a lo ni tawh bawk a ni.

He Mega Mock Drill hmanpui tur hian NDMA atangin Hon’ble Member Pu Harsh K.Gupta, Pu Shivaji Singh, Sr. Specialist, Col.J.K.Kaushik, Sr. Specialist, Pu S.S.Guleria, DIG, NDRF, Pi Tripti Parule, Media Consultant, Pu Ritesh Kumar Dwivedi, Asst. Comdt. leh Pu R.S.Saxena Team Coordinator te an lo kal a, chhiatna thlenna Mock Drill neihna hmun hrang hrang te tlawh kualin State Emergency Operation Centre leh DEOC-a mawhphurtu te hmalak dan te an enfiah bawk a ni.

NDMA atanga mithiam rual lo kal te hian vawiin chawhnu dar 2:00 khan I&PR Auditorium ah chanchin thehdarhtu te kawmna hun an hmang a, kum 1897-1952 inkar chhungah lirnghing liantham 7.5 Richter Scale chin tum 10 hmarchhakah a thlen tawh thu leh kum 1952 atanga vawiin thlenga a la thlen leh tak loh avanga lo thleng thut thei reng a nih hriaa uluk taka lo inbuatsaih lawk a pawimawh dan te an sawifiah a, inbuatsaihna tha avanga nunna leh in leh lo ram leh bungrua chhiatna nasa zawk thui taka pumpelh theih a nih dan te an sawifiah bawk.

Vawiin vek tlai dar 2:30 khan Aijal Club ah Mega Mock Drill thlirletna NDMA hotu te leh mawhphurtu hrang hrang ten an nei zui a, hmun tina endiktu atana ruat Observer te nen chetlak dan tha leh tha lo lai te sawihovin insiamthat tulna lai te sawilan a ni bawk. NDMA hotu te chuan chhiatrupna hmachhawn tura Mizoram Sorkar hmalakna te chu fakawm tiin mipui nawlpui hriat atana inzirtirna leh mock drill te pawh tam zawk la neih zel ni se tih te an rel bawk a ni.

Attachment

  • Loading attachment...