No.1646/2021-2022

Aizawl the 31st July, 2021 : Aizawl DC hmalaknaa buatsaih Fairelbel kaltlanga tanpui ngai te tana luangchhuak hmasa ber ni turin vawiin ni khan Mimbung kawtlang mipui te chuan chawhmeh chi hrang hrang thahnem tak an chhung lut.

Mimbung khua hian thlai chi hrang hrang - bawkbawn, samtawk, berul, antam, rawtuai, lakhuihthei leh fanghma te DC Aizawl kutah an hlan a, hlan tur hian Mimbung atangin VLTF aiawh, YMA aiawh, MHIP aiawh leh Aizawla an Association hruaitute an kal a ni. Chawhmeh hi Tipper pahnih leh Pickup pahnih khat an rawn phur thleng a. Heng chawhmehte hi DC Office chuan lo dawngin medical equipments leh a tul anga khawtlang tana hman tur pawisa fai lawmthu sawi nan an lo hlan let a ni.

Mimbung khua hi May ni 20 khan Containment zone-ah puan a ni a, thla khat chuang dawn containment zone a puan an nih chhung khan an khaw thenawmte hnen atangin tanpuina an dawng nasa em em a, ngaihsaktu an nei tha hle tih an sawi a. Chuvang chuan khawtlang mipui chuan Aizawl District lamah luanchhuah ve ngei ni se tiin rilru an siam a ni tih an sawi bawk.

Mimbung khawtlang hnen atanga chawhmeh chi hrang hrang lo thlengte hi veng 30 chuangah semchhuah nghal a ni a, he tanpuina dawng tur hian khawpui chhunga cheng khawsak harsa zual mahnia chawhmeh leina harsa te LLTF kaltlanga khawnkhawm a ni a. Chubakah, mahnia thlai tharchhuah neilo veng te, CMRF dawng tura thlanchhuah tamna veng te ngaih pawimawh zual an ni. Heng veng thlanchhuah chhunga cheng chhungkaw mamawh zual hnenah heng chawhmeh te hi LLTF kaltlanga pek an ni.

Tun hnai khan Aizawl Bawrhsap hmalaknain Aizawl District chhunga khawsak harsate leh tanpui ngaite tana mi tin luanchhuah theihna tur dawhthleng duanchhuah a ni a, a hmingah ‘FAIRELBEL’ vuah a ni. Fairelbelah hian chawhmeh, bungrua leh mitin mamawh tlem lua awmloin mi tin a duh apiang tan eng tanpuina pawh chhun theih zel a ni dawn a, a semchhuah leh dan tur ngaihtuah tur Committee pawh din a ni.