Vawiin khan Local Council member inzawmkhawm pawl, Aizawl City Local Council Association te chuan Synod Conference Centre-ah Assembly an hmang a, Aizawl Municipal Councial Chairman Pu CT Zakhuma chu khuallian a ni.

Pu CT Zakhuma chuan Local Council member te hi political party kawngka atanga lut ni mah se, an hnathawhna kawngah YMA anga lungrual taka khawtlang tana an thawh a ngai a ni, a ti. Chhiatrupna thil thleng thei kawng hrang hrangah fimkhur tura chahin furpui lo thleng turah hian leimin laka mipuite an him theih nan dihthlifarfem siam leh tuichhe paihna mumal, tuiluankawr tha neih ngawihpawimawh a tul, a ti a. Hei hian thui takin leimin lakah min chhanhim theih a beiseiawm, Aizawl Municipal Council Chairman chuan a ti.

Aizawl City Local Council Association Assembly-ah hian Local Council lawmman, Chairman tan cheng 5000 leh member tan cheng 4000 hi Aizawl Municipal Council hian pe thuai rawh se, tih te; tlangau nei lova hna thawh a harsat avangin AMC hian tlangau min pe leh rawh se, tih te; AMC tha tichak tur hian Mizoram sorkarin a tam thei ang ber thuneihna AMC kutah dah rawh se, tih te leh Aizawl khawpui chhung enkawl tura hna thawktu ber Local Council hrang hrang te hi tun aia duhsak ni rawh se tih resolution te chu he Assembly ah hian an passed a ni.

Chawhnu lamah thupui pawimawh thlan bik zirhona hun an hmang a. Performance of AMC, Licensing Regulation leh Vawk leh Ar chungchang tih thupui hmangin AMC CEO Pu Nghaklianmawia, Executive Councillor Pi Hmingthanzami leh Executive Councillor Pu Lalzirliana ten thu an sawi a ni.

Aizawl City Local Council Association Assembly vawiin a neih tan hi naktukah a tiak ang.