Directorate of School Education Department chuan a hnuaia mi ang hian thuchhuah a siam.
Mizo Students’ Union (MSU) Headquarters, N.Vanlaiphai chuan Govt. N.Vanlaiphai High School-ah kum 2011 atanga vawiin thlengin Science zirtirtu an neih loh avangin March 11, 2013 hmaa pek an nih loh chuan HSLC Science Practical Exam, March 11-14, 2013 chhunga neih tur chu boycott an tum thu local News Paper (Dt.5.3.2013) ah chhuah a ni a, he thil hi Department chuan pawi a ti tak zet a ni.
Govt. N.Vanlaiphai High School-ah hian B.Sc. zirtirtu pahnih -Chhanawia, B.Sc.,B.Ed. (Regular Teacher) leh K.Rosangliana, B.Sc. (Contract Teacher) te dah an ni a. Amaherawhchu, vanduaithlak takin Pu K.Rosangliana, B.Sc. (Contract Teacher) hi damlohna avangin school a kal thei rih lova, a zawm leh thuai pawh beisei a ni. HSLC Practical Exam hi an neih theih ngei nan a tul angin sorkar chuan hma a la nghal a ni. Amaherawhchu, High School pakhat zelah B.Sc. Teacher (Maths leh Science zirtir tur) pahnih zel pek tuma ruahman angin Department chuan Govt. N.Vanlaiphai High School-ah hian an mamawh tawk pek niin a hria a. School thenkhat B.Sc. Teacher pahnih nei lo pawh an insiamrem hram hram laia hetianga harsatna siam zawnga hma an la ta mai hi Department chuan pawi a ti tak zet a, buaina siam zawnga hma la lo hram turin MSU te hi a ngen a ni.
