No.4240/2021-2022
Aizawl, the 11th March 2022: Aizawl Municipal Corporation Board of Councillors Meeting ni 10 - 11 March, 2022 a neih chuan Aizawl Day atan Aizawl khawpui mei mit lova a din champhaphak February 25 chu a pawm a. He ni hi AMC-in kum tin ni pawimawh atana hmangin, Aizawl Day hi ropui taka hman a nih theih nan ruahmanna a siam dawn a. Aizawl khawpui hi February 25, 1890 atanga vawiin thleng hian mei mit lovin kum 132 chuang a lo ding tawh a ni.
Aizawl Mayor Pu Lalrinenga Sailo kaihhruai BOC meeting ni khatna-ah hian Councillors te zawhna hrang hrang chhanna hun neih a ni a, AMC hmalakna hrang hrang te Mayor-in report a pek hnuah Councillors te motion sawi chhunzawm niin, agenda hrang hrang te sawi ho a ni.
Meeting-ah hian Pu Lalringliana, Executive Councillor, Cash & Accounts changtu chuan kum 2022-23 chhung atana AMC budget cheng vaibelchhe 65.69 a pharh a. Budget atanga 72.29 % hi Mipui tana Development Works-ah hman a ni dawn a, a dang 1.04 % hi Office Inrelbawlna atana hman tur niin, Councillors leh Staff te hlawh leh lawmman atan 18.65 % hman a ni dawn a, Local Council member te lawmman atan 8.02 % hman a ni dawn bawk a ni. Budget hi uluk taka sawihona hun neih a nih hnuah lungrual takin member ten an pawm a ni.
BOC meeting hian AMC Enforcement Committee a din thar a; he committee hian AMC hmalakna hrang hrang te chak zawka kenkawh a nih theihna turin hma a la ang.
Local Council thar pahnih Leitan Ramthar leh Zemabawk South din turin meeting hian thutlukna a siam bawk a. Leitan Ramthar Local Council hi Durtlang Leitan Local Council atanga indang tur niin, Zemabawk South hi Zemabawk Local Council atanga indang tur a ni dawn a ni.
Meeting ni hnihna March 11, 2022 a neih chuan bawhhlawh paihna PPP mode a kalpui mek senso atana sharing pattern 80:20 ni thin chu a ennawn a. Solid Waste Management Center, Tuirial chu January 20, 2022 atangin AMC kutah a enkawl hna zawng zawng nen hlan a nih tak avang leh hemi enkawlna atan hian pawisa inhlan tel a nih loh avangin AMC tan senso a hautak dawn hle tih a lang a, chuvangin financial year thar atangin 60:40 (60% AMC, 40% LC/Public) a thlak turin ruahmanna a siam ta a ni.
Hoarding & Advertisement rate kum tamtak ennawn loh a hman tawh chu ennawn a ni a. Sawrkar kumthar atang chuan Hoarding enkawltu tur tender hmangin kumtin thlanchhuah a ni tawh dawn a ni.
Aizawl khawpuia in neituten property tax an ngai pawimawh tan viau a. Chutihrualin property tax pe tha duh lo tlemte an awm bawk niin a lang a. Chuvangin, Mizoram Municipalities (Property Tax Management) Rules, 2014 in a tarlan angin Property Tax a hun a pe lote chu an chhiah chawi tur atanga 10% emaw Rs. 20,000/- aia tam lo chawitir an ni tawh dawn a ni.
Aizawl Mayor Pu Lalrinenga Sailo chuan councillor zawng zawngte Aizawl khawpui tana an thahnemngaihna chu ropui a tih thu leh a lawm thu a sawi a, Aizawl hmasawn zelna tura theihtawp chhuah zel turin a sawm bawk a ni
