No.4241/2021-2022 

Aizawl 11th March 2022: Vawiin khan Health Minister Dr R.Lalthangliana hovin Secretariat Conference Hall, MINECO-ah Mizorama COVID-19 dinhmun thlirhona leh hmalak zel dan tur sawihona meeting neih a ni a. MOT Chairman Dr ZR Thiamsanga bakah DM&R, Health leh Home Department aiawh te, ZMC hotute, IMA, MOT, MKHC, Jt. NGO Coordination Committee leh Aizawl City Local Council Association aiawhte an tel a ni.

Dr R Lalthangliana chuan ram chhung state dangte nena khaikhinin positive zat la tam viau mahse hmun danga an tih tawh loh test Mizoramin a la kalpui hnem hle a, khaw thenkhatah phei chuan a khaw mite duhthusam ang takin mass testing te pawh kalpui a la ni, a ti a. Positive zat tam deuh mahse nunna chan erawh State dangte khaikhinin an tlem hle a ni, a ti. Mobile RT-PCR chu a tul huna hman mai theih turin Lengpuiah dah a ni a, ICMR kaltlanga UNICEF atanga Mizoram State-in a dawn RT-PCR pariat pawh ICMR lamin an rawn thawnchhuak tawh a, hun reiloteah lo thleng mai tura beisei a ni, Minister chuan a ti. ZMC-a enkawl ngai an tlahniam a, hrilen vanglaia awl hman lo khawpa damlo ngah thin khan tun dinhmunah admit ngai an tlem ta hle a, OPD pawh hawn thuai tum a ni tih Health Minister chuan a sawi a. Chutiangin, District tina DCHC, CCC leh 4C-a admit ngai an tlem hle a, hrileng avanga State in harsatna a tawh chu a kiam ta viau tih a sawi a ni.

MOT Chairman Dr ZR Thiamsanga chuan COVID-19 active case a tlahniam a, kan dinhmun a ziaawm ta hle tih sawiin hei hi Pathian awmpuina leh kan zavaia thawhrah a ni, tiin lawmthu a sawi a. Nunphung pangngaiin kan let chho leh tawh dawn niin a lang tiin hripui lengin kum 2 chuang Mizoram a tihbuai chhunga rim taka a do let hna thawktu zawng zawng te chungah lawmthu a sawi a ni.

Meeting-ah hian kohhran inkhawm chungchang leh kohhran inrelbawlna chungchangah MKHC ten an duh dan an sawi chu Chairman Dr R.Lalthangliana chuan ngai pawimawhin Chief Minister leh State Executive Committee (SEC)-ah te thlen ni se tiin meeting chuan a rel a. Zirlai te Offline a Class kal chungchang pawh sawiho niin SEC ah thlen ni se an ti bawk.

Mizoram chhunga District hrang hrangah hrikai enkawlna DCHC sawmhnih a awm mek a. Chung DCHC a damlo enkawl theih zat atanga chhutin tunah 18% chauh hrikai enkawl mek an awm a. CCC-a awm thei zat atanga 5% chauh luah khah niin 4C khum 14,045 awm theihnaah damlo 683 chauh awmin hei hi 4.8% a ni. Mahni in lama inenkawl home isolation-a awm mek hi mi 2678 an awm a, chu chu active case awm zat atanga chhutin 75% a ni.

ZMC Director Dr John Zohmingthanga report danin February 11, 2022 thleng khan he hospital ah hian COVID-19 damlo mi 8246 admit an ni tawh a, dam taka chhuak 7676 (93%), COVID-19 hri kai boral 474 an awm tawh a ni. COVID-19 vanga boral 75.3% te hi kum 60 chunglam an ni a, 67% AMC area chhunga cheng an ni. Thi zinga 30% te chu damlo, chau tawh tak an ni a, 31% te hi vaccine full dose la an nih laiin 58.8% te chu vaccine la la miah lo an ni thung.

March ni 10, 2022 thleng khan Mizoramah COVID-19 Vaccine dose 14,89,659 pek chhuah a ni tawh a. Heng zinga 1st dose la tawh chu 8,09,197, full dose (vaccine vawihnih) la tawh 6,55,719 niin Precautionary dose - 24,743 pek chhuah a ni tawh bawk.

COVID-19 hri len hnu hian pawl hrang hrangin Health Department-ah thilpek an pe nasa hle a. State Bank of India chuan tun hnaiah ICU khum 50 a pe a, kalkawngah a thang mek a, District hrang hranga dah theih a beiseiawm tih Dr T.Lalhmangaihi, Director H&ME chuan a sawi a. HDFC chuan Doctors For You (DFY) kaltlangin ICU khum 20 Mizoram a pe a - Lunglei tan 5, Siaha tan 5, Aizawl Civil Hospital tan 10 dah a ni ang. DFY kaltlang vek hian equipment pawimawh leh manto 7 lai pek an ni dawn bawk a ni. Heng bakah hian Tata Trust chuan ICU khum engemawzat pe tawhin OIL India atangin ICU khum 15 dawn a ni tawh bawk a ni.

Central Sector Scheme hnuaiah North East Special Infrastructure Development Scheme (NESIDS) hmangin Sawrkar Laipui atanga hmasawnna hnathawhna tur sum sanction zingah Health Infrastructure siam leh cheithatna tur engemawzat dawn a ni a. Cardiology leh Nephrology Department te tihchangtlun hna thawh mek a ni a. Health Minister hmalaknain Boeing Company chuan Nephrology Department tihchangtlun nan cheng vaibelchhe 1.5 man hu hmanrua a pe a. Civil Hospital-a hman tur MRI pawh he company vek hian a ngaihtuahsak leh dawn tih meeting-ah hian sawilan a ni.