No.4239/2021-2022

Aizawl the 11th, March, 2022 : Vawiin chawhma khan District Level Committee on Myanmar Refugees Lunglei District buatsaih in DC's Conference Hall, Lungleiah Myanmar Raltlante pualin dan leh hrai inzirtirna, Legal Awareness Campaign for Myanmar Refugees within Lunglei District neih a ni. Lunglei Bawrhsap Pu Kulothungan A, IAS chuan he hun hi a hmanpui a, he campaign ah hian Lunglei Town chhunga Myanmar raltlan nei vengte atangin Village Level Committee on Myanmar Refugees aiawh pakhat, raltlan atangin mi pakhat theuh leh Chin Welfare Committee aiawhte an tel a ni.

Legal Awareness Campaign inkhawm hi Pu K. Lalrohlua, Addl. DC leh Nodal Officer for Myanmar Refugees, Lunglei nibawk chuan kaihhruaiin Pu Kulothungan A chuan Myanmar raltlante tana dan leh hrai inzirtirna hun hman a ni hi lawmawm a ti a. Lunglei District ah hian Refugees Camp pariat (8) awmin raltlan 2007 an awm thu sawiin sorkar laipuiin raltlan anga a la pawm loh avangin an tan hmalak a harsa a ti a, hetihlai hian Mizoram Sorkar chuan District Level Committee te siamin a theih ang angin raltlan te chu an ngaihsak a ni a ti. Raltlan te chu India ram dan leh inrelbawlnate zah chungin thlamuang taka awm turin a chah a. Dan bawhchhiatna hrang hrangah inhnamhnawih lo a,khawtlang tana , mi tangkai ni turin a sawm a ni. India ram chhunga entik thleng nge in awm dawn tih a hriat lova, chuvangin India ram dan leh hrai te hi in hriat ve a in zawm a ngaih thu sawiin Legal Awareness Campaign hi a vawikhat hmanna chauh a ni a, Camp hrang hrangah kalchilhin zirtirna tam zawk pek tum a ni a ti bawk.

Legal Awareness Campaign ah hian Pu Malsawmdawngliana, Asst. Public Prosecutor, District Court, Lunglei leh Pu Zonghinga, PI, Prosecution Branch, Lunglei ten India ram dan chi hrang hrang ND&PS Act, IPC, JJ Act, MLTP Act, Foreigner Act te sawifiahna leh dan bawhchhia te hremtheina te an sawi bawk a ni.