No.4238/2021-2022

Aizawl the 11th March,2022: Vawiin chawhma dar 10:30Am atang khan MADC kawt zawlah, Mara te Kut zinga ropui ber LYUVA KHUTLA chu MADC bultumin lawmna programme hawihawt a ni. Covid-19 SOP zawm chungin vawiin programme hi ropui taka hman a ni.

Covid-19 hrileng avangin kum danga hman thin ang chuan mipui tam loh mahse, sawmbik te nen hlim leh lawm taka hun hman a ni.

Kumin Lyuva Khutla-2022 a Kut Pa(Azipa) chu Pu S Vadyu, Ex- CEM, MADC a ni.

Vawiin Lyuva Khutla lawmna programme hi Pu K.Chhihrau, Chairman,Lyuva Khutla Organizing Board leh Executive Secreatry,MADC ni bawk chuan kaihruaiin, Rev.NC.Vabeilua in hunserh a hmang a. Pu FC.Zakhai Hlado chham ri chu Pu K.Ngiabei leh Pu K.Thansiama te Tawtawrawt hamri in a chhunzawm nghal a ni. Meisavaih 'W' MTP Branch ten thiam taka Kut hawnna hla(opening song) an sak zawhah Kut Pa Pu S.Vadyu chuan Kut(Chaypi) puan pawtkangin thusawina hun a hmang nghal a ni.

Pu S.Vadyu chuan Mara hnam te pawnlam mi in min hmuhdan hi The Lakhers N.E Perry ziah lehkhabu hrang hrangah hmuh tur a awm. Mara hnam te hi hnam huaisen,taima, rinawm leh mikhual duat thiam tak, kan pumrua te pawh kan chhehvela hnam dangte aia tha in min ziak a ni. Chuvangin kan Kut hman te hian, kan nihna min hriatnawn tir se, kan pi leh pu te nunze mawi leh tihdan tha chhawmnung zel turin chona thar min pe mawlh rawh se, a ti.

Pu Lalsangliana, District Bawrhsap pawhin thu sawina hun a hmangin, Vawiina Lyuva Khutla lawmna huna thusawi ve tura sawm ka ni hi ka lawm hle a ni. Vawiina kan Kut hman hi kan intihlimna hrang hrang leh kan zai leh lamah te tawp mai lo se, Kan Pi leh Pu te nunze mawi min chhawmnun tirtu hmanraw tangkai taka kan hman theuh theih nan duhsakna ka hlan a che u, a ti.

Vawiin Lyuva Khutla lawmna-ah hian Mara hnam lam zinga langsar zual, heng: 1) Sawlâkia
2) Khohcheinô Lâ
3) Awkhy Lâ te chu Art & Cultural Emompanel Group ten an entir a. Vocational School of Education Fashion Designing Institute,Siaha ten Hnam incheina entirna (Cultural Dress Show) an entir bawk.

Thusawi leh Hnamlam entirna kar lakah hian Siaha district Zaithiam ten mipui an awi reng bawk a ni.

Vawiin hun hmanah hian Myanmar Idol David Lai leh Miss Mizoram Zirsangpuii te pawh an tel ve a ni.

Pu JB.Chozah, Secretary Lyuva Khutla Organizing Board leh Art& Culture Development Officer,MADC ni bawk chuan lawmthu sawina in vawiin Kut lawmna programme hi a khar ta a ni.