Vawiin khan Aizawl DC Conference Hall ah Aizawl DC Pu Kanan Gopinathan hovin Disaster Management chungchanga District inpuahchah dan thlirhona hun neih a ni.

DC Pu Kanan Gopinathan chuan chuan Aizawl District Disaster Management Authority (DDMA) app thar presentation a nei a. DDMA app hi android app niin siam mek a ni a, beta testing stage-ah a awm mek. He app hi tlangzarh la ni chiah lo mahse mipuiin an hmang tan tawh a, chhiatna lo thleng chungchang rang taka report-na te, tanpui tura ngenna rescue me alert features te, chhiatrupna lo thlen thulha tih leh tih loh tur inziahnate bakah DDMA Zonal Officer biak pawh zung zung theihna te a awm a. Nitin notification pek chhuah niin lirnghing, thli leh ruah chungchanga India Meteorological Department (IMD) thuchhuak tarlan thin a ni bawk. Android phone hmang te tan google playstore atangin a thlawnin a download theih a ni. Aizawl DC, ADC, DDMC te mobile number tarlan a ni a. District Emergency Operations Center ten darkar tin an vil reng a ni.

Aizawl SP Pu Lalhuliana Fanai chuan Aizawl District Police Disaster Management Plan a present a. Aizawl DC Office aiawhin DDMC Pi Irene Lalmuanzovi, Health Department aiawhin Consultant Dr. Linda Lalbiaknungi, PHE Department aiawhin EE(P) Pu ZD Dengkhuma leh Power and Electricity Department aiawhin SE Pu Lianlunga te chuan an department Disaster Management Plan chungchang sawifiahna hun an hmang a ni.

Disaster Audit programme ah hian Disaster Management & Rehabilitation Department, Aizawl DC Office, Science & Technology, Local Administration Department, Economics & Statistics, PHE, P&E, Food Civil Supplies & Consumer Affairs, Aizawl SP office, Fire & Emergency Services, 3rd Bn. MAP, Mizoram Home Guards leh Health & Family Welfare Department aiawhte an tel a ni.