1966/2024-2025

Aizawl, 09.09.2024: Vawiin chawhma khan Aizawl DC Er. Lalhriatpuia hovin DC Office Pisapui Hall-ah Swachhata Hi Seva 2024 Campaign kalpui dan tur sawiin District Level Steering Committee on Swachhata Hi Seva 2024 chu an thukhawm. Khawpui chung leh thingtlanga sorkar department, khawtlang leh tlawmngai pawl anga hmalakna tur hrang hrang te inhrilhhriata kalpui dan tur sawiho a ni.

Aizawl DC chuan faina leh thianghlimna kawnga kumtin hmalakna lo neih tawh thin dan sawiin, heng hmalakna te hi kan tih tur atana tuk a nih avanga ti mai lovin, faina hi kan nunphung ah bet tlat tawh se a duh thu a sawi a. Khawtlang faina leh thianghlimna hian kan bawlhhlawh paih dan te, tuichhe paihna leh luan kawr siam dante a huam tel vek thu a sawi a. Fur hunlaia chhiatna kan tawh tam tak hi kan tui paihna leh luan kawr (drainage) fuh tawklo avang a nih thu sawiin, kan him tlan nan chuan drainage tha neih te, kan in leh lo a him tawk em tih enfiaha report-na hmun tura report a tul thu a sawi. Swachhata Hi Seva campaign chu a hlawhtlin thieh nan member-te inpawhtlang taka thawkho turin a sawm bawk a ni.

Vawiin meeting ah hian Addl. DC Pu Mark Lalthanliana chuan sorkar laipuia Ministry of Housing and Urban Affairs in he faina campaign atana ruahmanna a rawn siam dan bawhzuia district level a hmalak a nih tur thu sawiin, hun kalta ah ODF leh ODF Plus hmalakna te lo kalpuiin Mizoram chuan hlawhtling takin a lo kalpui tawh dan te a sawi a. Tun tuma hmalakna tur hrang hrnag pawh hlawhtling taka thawh zawh a nih ngei a beisei thu a sawi. He huna hian Nodal Officer (Grameen) Pu H. Lallianmawia, Sr. EE, PHED leh Nodal Officer (Urban) Pi Lalhruaitluangi, DD (Hqrs.), UD&PA te hnen atangin thingtlangah leh khawpuia hmalak dan tur hrang hrang duan sa awm te chu sawifiah a ni.

Kumin SHS campaign ah hian ‘Black Spot’ an tih, Cleanliness Target Units (CTUs) - hnawmhnawk inchhekkhawm, khawtlangin rei tak a lo ngaihthah tawh, environment leh mipui hriselna atan pawha pawi thei tur awm angte zawnchhuaha thenfai chu hna pui ber tur pakhat a ni a. Heng Black Spot tihfai nan hian faina hnatlang neih a, a hmunhma siam danglam (transform) in, hmun nuam leh tangkai ah a remchan dan anga siam te chu hmalak dan tur pakhat a ni a. Zirlai te zingah in hrilhhriatna hmanrua atan inelna hrang hrang buatsaih te, mipui hnenah inziritrna pek te tel bawkin, faina kawnga hnathawk (eg, LAD hnuaia sweeper te, dumping ground a bawlhhlawh sawngbawltute) tan a thlawn a health check up buatsaih leh hmalakna dang dang a tel a ni.

Vawiin meeting-ah hian tlawmngai pawl hrang hrang leh Local council tin aiawhte an tel bawk a ni.