No.2266/2021-2022

Aizawl the 17th, Sept' 2021: Aizawl D.C. hmalaknain Covid 19 Lockdown leh a kaihhnawih thil avanga harsatna tawk, in luah man pe theilo leh damloh buaina avanga harsatna tawk mekte tanpui an nih theih nan ‘Fairelbel’ Charity Fund din a ni a. Hemi atan hian ZONET leh LPS Cable TV te chuan Live Charity Concert buatsaihin hetah hian mipuiten an thawhkhawm sum tlingkhawm Rs.23,45,000 /- chu DC kutah hlan a ni.

Vawiin khan Fairelbel Utilization Committee chu an chairman Dr Lalhriatzuali Ralte, Deputy Commissioner, Aizawl District hovin DC Conference Hall-ah an thukhawm a. Fairelbel Charity Fund-a sum tlingkhawm Rs.23,45,000 /- hmanga AMC huamchhung Veng hrang hranga Covid-19 avanga miharsa zual chhawmdawlna pek dan tur an rel ho a ni.

Fairelbel Utilization Committee thukhawm hmasak ber chuan Veng tina YMA ten chhawmdawl ngaite lo dap chhuak tura a ngen angin mi 143 lai hming thehluh a ni a. Vawiina Utilization Committee thukhawm chuan heng hming thehluhte dinhmun zirchiangin YMA-te rawtna thehluh ang ang chu pawm vek niin DC hnenah ‘Fairelbel’ hnuaia tanpuina dilna mimala thehlut mi 4 dangte hnenah pawh tanpuina pek vek remtih a ni.

Aizawl D.C. Dr Lalhriatzuali Ralte chuan Covid hrileng avangin AMC huamchhungah sorkarin rei tak Lockdown a puang a, hemi avanga eizawnna lama nasa taka harsat phah chhungkaw engemawzat an awm mek a, nikum atang daih tawhin CM Relief Fund kaltlangin tanpuina sem mek ni mahse mamawhtu an pung reng a ni a ti a. D.C. Office hmalakna ‘Fairelbel’ ah phal taka sum thawh zawng zawngte leh an thiamna leh larnate hmanga live charity concert hlawhtling taka tihhlawhtlin saktu zawng zawngte chungah Dr Lalhriatzuali Ralte chuan lawmthu a sawi a. YMA Branch 49 atanga tanpui ngai hming thehluhte chu Utilization Committee-in a pawm vek thei chu lawmawm a tih thu leh an vengchhunga tanpui ngaite hming la thehlut lo YMA Branch dangte pawh Committee chuan karleh Zirtawpni ( ni 24.9.2021) thleng thehluh rem tihsak an ni tih a sawi bawk.