Vawiin khan Secretariat Conference Hall, New Secretariat Complex ah Aizawl DC Dr A.Muthamma IAS kaihhruaina hnuaiah Dt 26.04.2018 a Mizoram chhung district hrang hranga Multi State Mock Exercise on Earthquake Disaster neih dan tur relin meeting neih a ni. He hunah hian sawrkar Department hrang hrang hotute bakah Ramthar leh Dawrpui YMA hruaitute leh Millenium centre security aiawhte an tel a ni.

Aizawl DC Dr A.Muthamma chuan Multi State Mock Exercise on Earthquake Disaster hi kan thenawm state Manipur, Nagaland leh Tripura te ruala neih tur a ni a, chhiatrupna thlen thila kan inpuahchah that leh that loh hi National Disaster Management Authority atanga mi tirh ten he hunah hian min thlithlai reng dawn a, heng kan thenawm state te nena kan inpuahchah dan leh kan kalpui dan te hi khaikhin a nih dawn avangin sawrkar department hrang hrangte leh khawtlang hruaitute thawh hona a pawimawh hle a ni, a ti.

Multi state mega mockdrill on Earthquake Disaster hi Aizawl hmun hrang hrang 5-ah te neih a ni dawn a, chungte chu Millenium Centre, Govt. Republic Higher Secondary School Ramthar Veng, Govt. Offices Capital Complex, Sihpui Ramthar Veng leh Civil hospital ah te a ni a. Heng hmunah te hian lirnghing nasa tak a rawn thlen palha sawrkar department hrang hrangte leh khawtlang hruaitute bakah State leh National Disaster Response Force te hmalak dan tur enchhinna neih a ni dawn a ni.

Multi state mega mockdrill coordination meeting ah hian department hrang hrangte chanvo leh mawhphurnate inhrilh hriatna hun hman a ni a, ni 24 April, 2018 hian table top exercise neih leh tura rel a ni bawk. Inthlan kalpui mek anih avangin Mega Mock drill hi Lawngtlaiah buatsaih a ni dawn lo a ni.