Pradhan Mantri Ujjwala Yojana (PMUY) hnuaia BPL hmeichhiate tana LPG connection a thlawna semna ni Ujjwala Diwas chu vawiin khan Khamrang community hall ah Bialtu MLA Pu Hmingdailova'n a hmanpui.

He hunah hian Khuallian chuan thu sawiin LPG Connection lo chhuahna chhan bulpui chu hrisel zawk leh awlsam zawka eirawng bawl chauh ni loin eirawngbawl nana thing leh mau hman nasat luata dai theu leh ramngaw chereu tur ven chu a tum pakhat a ni a ti. Mizote chu thil renchem nachang hrelo kan nih fo thu sawiin a bik takin Gas, tui leh Electric te chu tul lova khawhral mai mai lovin ren thiam taka hman kan zir a hun tawh a ni a ti. Sawrkar ina BPL hmeichhiate a thlawna Gas connection pekna kalphung (scheme) a ruahman sak chu lawmawm a tih thu sawiin Sawrkar ina daitheu leh ngaw alo chereu zel loh nana a thlawna gas connection a sem chu rinawm taka kalpui tura chah in thing leh mau hmang tawhloa eirawngbawl dan hrisel zawk chu kalpui theuh turin a chah a ni. Mizote chu rinawmna kan tlachham fo thin a ni tiin khawsak pangai tak tak te pawh BPL nih kan tum talh thin a khawsak harsa zawkte chu BPL nilo an awm fo thin a, hei hian kan in bihchian a ngaih thu a tilang a ni a ti bawk a, Thu a sawi zawhin Khuallian chuan Gas Connection a thlawna dawngtur te hnenah a sem nghal bawk a ni.

Pu D.Biswas, Sr.Manager (LPG Sales) Silchar Area Office pawhin thu sawiin PMUY thil tum chu BPL hmeichhiate tan a thlawna Gas Connection pek a nih mai piah lamah India rama hmeichhiate dinhmun chawikan, Ramngaw chereu tur ven leh eirawng bawl dan kalphung pangai/hlui (Traditional way of Cooking) ina eirawng bawltu hmeichhiate hriselna  a thalo zawnga a nghawng thin te tihtawp a nih thu a tarlang a ni. WHO Report ina a tarlan danin eirawng bawl dan hrisel lo (thing, mau bawng-ek ro etc hman) chuan inchhungah mei khu nasa tak siamin hei hian khawvel hmun hrang hrang kumtin hmeichhia nunna nuai 15 vel a suat thin a, India ramah ngei pawh kum tin hmeichhe nunna nuai 5 vel a suat thin ani a ti bawk.

PMUY hi Prime Minister Narendra Modi chuan may ni 1, 2016 khan Ballia, uttar Pradesh ah a tlangzarh a, Mizoram ah chuan Chief Minister Pu Lal Thanhawla'n  September ni 15, 2017 khan a tlangzarh a ni. He Scheme hnuaiah hian BPL hmeichhia BPL/AAY Gas connection la neilo ten a thlawnin Gas Connection an dawng thei a, Gas hi a thlawna dawn theih a nih laiin Consumer ten heng Voter ID, Aadhar Card, SC/ST Certificate, BPL/AAY Ration Card leh Bank Account an neih a ngai a ni.

PMUY hian Gas Connection bakah Gas Stove, Regulator leh Gas Bur a tak awm chu a thlawnin a pe anga, Gas chu vawi 6 (6 refills)a thlawnin a thun theih bawka vawi 7 na atang erawh chuan pawisa chawi a ngai thung dawn a ni. He Scheme hian India ram pumah Gas Connection Vbc 5/ 5 crores (extended Scheme nen chuan 8 crores) chu a thlawna pek chuah a tuma tun din hmunah vbc. 3.56 (3.56 crores) pek chhuah tawh a ni. kolasib District ah chuan Khaw 22 te chu may ni 5, 2018 hma hian thing ,mau, bawng ek etc (Solid Fuel) hmang tawhloa meikhu awm lohna khua (Smokeless Village) a siam tumin hrisel zawk leh awlsam zawka eirawngbawl tura hmalak a ni dawn a ni.