Vawiin chawhma khan DC Conference Hall-ah Aizawl DC Dr A. Muthamma, IAS  hovin Project HIMNA-MADAT (Mizoram Against Drugs, Alcohol & Tobacco) memberte chuan inbiakrawnna neiin an thukhawm.

Aizawl DC Dr. A. Muthamma chuan thusawiin drugs, vaihhlo leh zu hman sualna kawngah mizote kan sang hle a ni tiin kan khawtlang pawh a tibuai nasa a ni, a ti a. Heng thil pathum hman khawlohna in a thlen buainate chinfel dan thahnemngai taka kan ngaihtuah ho a, hma kan lak a hun tawh tak zet a ni, a ti a. Heng buainate chinfel kawngah hian supply lam leh demand lam a awm a, supply lamah hi chuan kan NGO-te a bik takin YMA-in tan an la nasa a, an fakawm hle a ni tiin demand lam, drugs leh vaihlo hmang sualtute-ah hian tan lak a ngai a ni, a ti. Aizawl DC chuan thalaite zinga drugs, vaihlo leh zu hman sualna chunga beihpui thlaknaah hian kohhran hruaitute an pawimawh tak zet a ni tiin HIMNA-MADAT hnuaia Aizawl district school hrang hrang zirchianna ah chuan zirlai zingah drugs leh a kaihhnawih thil thalo dang tih ching leh zawngchhang taka hmang an tam hle a ni, a ti a. Mizo thalai tam tak tibuaitu hi kan vaia tangrual chunga kan beihlet a pawimawhzia kan hriat thar theuh a ngai a ni, a ti bawk. Beihpui thlakna hnuaia hmalakna tarlangin school- zirtirtute leh zirlaite tan drugs, vaihlo leh zu thatlohnate, thluak a tihchhiat theih dante leh do let dan tur zirlaibu buatsaih mek a ni a, school hrang hrangah sem tur niin karkhatah vawi khat tal class neih tur a nih thu a sawi bawk.  

IASE Principal Pi Vanlalhruaii chuan HIMNA-MADAT project chungchang sawi zauna neiin Mizoram chu kristian tamna ram kan nih angin kohhran lamin hma kan lak chuan hlawhtlinna tam tak kan hmu thei a ni tiin chhungkaw pawimawhna a tarlang tel a. State Nodal Officer (Mental Health) Dr Robert L. Khawlhring chuan ‘Technical aspects of substance abuse’ tih thupui hmangin report a pe a. Thalaite zingah ruihhlo bawiha tang an tam thu zirchianna hmangin a tarlang a.Ruihhlo leh depression inkaihhnawihnate a sawifiah bawk a. Ruihhlo hi kan khawtlang tana thil hlauhawm tak pakhat a ni tih kan pawm tlan a hun tawh a ni, a ti.

Meeting chuan sawrkar leh kohhran hrang hrangin ruihhlo beihpui an thlak theih dan tur leh hmalak a lo nih tawh dante an sawiho a. Kohhran leh NGO hruaitute tan training mumal taka buatsaih turin rel a ni a. Project HIMNA-MADAT hnuaia schoolte chu Kohhran,YMA, MHIP etc leh HIMNA-MADAT member ten ngun taka vil turin leh zirlai ruihhlo hmang miahlo awmna school te chu chawimawi a, lawmman pek ni se tihte rel a ni a. Zirtirtu, zirlai leh nu leh pate nena inhmuhkhawmna hun neih a, ruihhlo dona chungchang sawiho ni se tiin an rel bawk.

Project HIMNA-MADAT (Mizoram Against Drugs, Alcohol and Tobacco) hi New Economic Development Policy (NEDP) hnuaia Aizawl DC Pilot Project niin ruihtheih thil laka thalaite an fihlim theihna tura ruahmanna a ni a. A enchhin nan Aizawl District chhunga school thlan bik 50-ah  kalpui mek a ni a. HIMNA-MADAT hnuaia Research and Documentation Sub-Committee chuan ruihtheih thil laka beihpui thlakna tura zirchianna an neihnaah school naupang an zirchian zinga 53% chuan ruihtheih thil ti thiante an nei a, zirlai zirchiannaa tel 85.8% chuan an chhungkaw zingah ruihhlo hmang an awm a, an thiante chu ruihhlo ti tura kawhhmuhtu an ni tlangpui a, vaihhlo leh zu chu zirlaiten an khawih nasat ber pawl a ni a, ruihhlo khawih tur a awm chuan ti thei mai zirlai zingah an tam thu te tarlan a ni.

Project HIMNA-MADAT Coordination and Implementation Committee chu February Ni 27, 2018 khan din a lo ni tawh a, Aizawl DC chu chairman niin Research and Documentation Sub-Committee hi April Ni 19, 2017 khan din niin IASE Principal Dr. Lalnuntluangi chu chairman a ni.

Vawiin meetingah hian Department hrang hrang H&FW, School Education, Social Welfare, Anti Tobacco leh Anti Drugs abuse lama thawktu te, MSACS leh Aizawl DC lama thawktute leh Kohhran hrang hrang hruaitute an tel a. Chawhnu lamah Measles-Rubella Campaign, HIV/AIDS chungchang te sawihona neih zui a ni.