Vawiin khan Govt. Kolasib College ah One Day Programme on Gender Sensitization Programme chu Fisheries Minister Pi Vanlalawmpuii Chawngthu in a hmanpui.

He hunah hian khuallian chuan thu sawiin "hmeichhe lu chu mipa, mipa lu chu Krista a ni" tiin hmeichhia te chuan mahni pasal te zah leh chawimawi chu an tih fo tur a ni a ti a. Tunlai Khawvel kal chho ah mipa leh hmeichhia te chu tharum nilovin thiamna leh finna ah te an in el chho tawh a, hmeichhia ten hma an sawnin an changkang tawh a, hna exam (Competitive) ah te pawh mipa ten hmeichhia an phalo tan meka mipa te tan tan lak zual sauh sauh a ngai a ni a ti. Ram kaihhruaina kawngah Officer emaw Politician emaw ni turin tum ruhna leh tihtak zet na nena beih a ngai a ni a ti bawk.

Politics ah emaw Sawrkar ah emaw Hna lian thawk turin hmeichhiate chu an tum a ruh leh zual a ngai a ni tiin Mipa te thawh ang te chu thawk ve tura inhuam a pawimawh ani a ti. Minister, MLA, Officer te hi a nihna ringawt nilovin Ram leh Hnam tan tih tak zeta hnathawh a pawimawh thu sawiin tluk palh a awm fo thei a, heng hunah te hian beidawng mai lova thochhuakin hmalam pan zel a pawimawh thu a sawi bawk a ni.

Kristian tamna ramah Dikna leh Rinawmna kan tlachham em em mai chu veiawm a tih thu sawiin Ram siam tha turin kan zavaiin kan pawimawh a Minister, MLA leh Sawrkar hnathawkte chuan rinawmna kan hmachhuan reng a pawimawh a ni a ti. Politics chu ram leh hnam tana rawngbawlna platform pawimawh tak a ni tiin hausak tumna a tana hman chi a niloa, Politics chu thianghlim takin a khelh theih thu sawiin Politician thenkhat tih dikloh avanga Politician zawng zawng hmer tel an nih thin chu tha a tiloh thu a sawi bawk a ni.

Khuallian chuan zirlai kalkhawm te chu fuihin tunlai khawvelah kan ngaihsan zawng te kan thlak a hun tawh a ni tiin Mimal a bik takin Sawrkar hnathawk Officer thenkhat te chu pawl hrang hranga sum an thawh hnem avanga ngaihsan ringawt te, In leh lo ropui tak tak nei te chu ngaihsan nghal ringawt chi an niloa, khawia sum/pawisa nge an thawh a, khawia pawisa in nge in leh lo an sak tihte ngaituah hmasa a, thawhchhuah phulo khawpa hausa te chu kan ngaihsan loh ngam a hun tawh a ni a ti. Chutih rualin thawhchhuah nei te pawh mahnni thawhchhuah mila kan khawsak thiam/ngam a pawimawh a ni a ti a, thawhchhuah la neilo a bikin zirlai te chu Mobile Phone changkang tak tak leh incheina man to tak tak te chu mahni nu leh pa te bulah ngen lo ngam turin a chah bawk a ni.

Mizoten Social Media kan hman fimkhur a ngaih thu sawiin thudik hrechiang mang hlei loa Watsapp leh Facebook velah thu kan vawrh darh chiam chiam a, hengte hi bansan a pawimawh ani tiin zirlai te pawh Social Media a mi thu post thin te chu awih nghal ringawt lovin thudik a nih leh niloh te zirchiang hmasa thin turin a chah a, Mahni zirna leh Chhungkaw nunphung ti khaihlak khawpa Mobile Phone khawih chu mimal, chhungkua leh ram tan thanmawhbawk ani tiin chintawk hriat a pawimawh thu a sawi a ni. Hemi bakah hian Khuallian chuan incheina chungchang sawiin mahni dinhmun mila inchei turin leh zahawm taka inchei thin turin kalkhawm te a chah a, mi hlawhtling leh mi puitling ni turin hun vawn dik leh mahni Nu leh Pa te thuawih chu rahbi pawimawh tak a nih thu a sawi bawk a ni.

Khuallian thu sawi zawh ah hian Prof. Lalneihzovi (Public Administration) Mizoram university, chuan hmeichhia leh mipa inkara inthliarna chi hrang hrang awm thei leh a kaihhnawih chungchangah zirtirna a pe a, Prof. T. Vanlaltlani, Aizawl Theological College chuan Mizo chhungkua, khawtlang leh ram inrelbawlna kawnga Mizo hmeichhia te chawisan na chungchangah zirtirna a pe bawk a, hmei zawhah hian kalkhawm te nen zawhna leh chhanna hun hmangin sawihona te neih bawk a ni.