Ei leh bara Mizoramin hma a sawn theihnan a kawng hrang hranga sawrkar leh mimal leh pawla anga mawhphurhna fawng vuantute intawhkhawmna runpui, Mizoram Economic Conclave chu Mizorama a vawi khatna atan vawiin chawhma khan Chief Minister Pu Lal Thanhawla chuan Assembly House Annexe Conference Hall-ah a hawng a; Conclave pual hian NEDP Video leh Booklet a tlangzarh nghal. Conclave hawnna inkhawmah hian Planning Minister Pu Lalsawta chu khualzahawm a ni a. Planning and Programme Implementation Department buatsaih niin nileng a awh a ni.

Chief Minister chuan Conclave chu ramin hma a sawn theih nana mi thahnemngai kalkhawm ten an ngaihdan inhrilhtawn a an sawihona hun a nih angin ram tam hlawkthlak hle tura a beisei thu sawiin, a buatsaihtu department chungah pawh lawmthu a sawi a. Ram ei leh bar, economy hmasawnna chu thui takin sawrkarna tha/ good governance-ah a innghah thu Chief Minister chuan sawiin, tun dinhmunah state dangte leh India ram pum huap pawhin Mizoram chu GSDP leh Per Capita Income-ah te a thang chak pawl leh a sang pawl a ni chho ta zel chuan sawrkarah thawktu tha leh thahnemngai tam tak an awm zia a tilang a ni, a ti a. Sawrkar hna piah lamah Private Sector-ah pawh Mizoramin hmasawn theihna tam tak a neih zia puanzar a tul thu leh, chumi atan chuan state pawnah  tun hnai lawka “Magnetic Mizoram Roadshow” te lo buatsaih a lo nih tawh thu te a tarlang a. Chumi zarah chuan ram dang investor company ten Solar Energy, nizung hmanga kawlphetha siamchhuak tura Mizoram chu thawh dunpui atan tunhnai maia an rawn dawr thu leh, thawhdunna thuthlung buaipui mek a nih thu te Chief Minister hian a sawi a ni. Kaladan Multi Modal Project pawh Mizoramin kawng a siam tur chin a siam zawh tawh thu leh, Burma lamin a zawmtu tur kawng an peih hun nghah a nih thu te sawiin, helai area a thlawhna tum hmun tur pawh ngaihtuah mek a nih thu te, airport siam chu sawrkar laipui pawhin a thuphung chuan a pawm vek tawh thu a sawi bawk.

CM Pu Lal Thanhawla chuan ram economy than dan chu lawmawm viau mahse hmasawnna han thawh tak taka harsatna lian tak tawh fo thin chu sum ngainat luat hi a ni, a ti a. Sawrkar hmalakna lian tham, kawng siam leh rel kawng siam hna te tithuanawp thintu chu ‘compensation’ a ni, a ti. Ram hmasawnna thangduang tur chuan muanna a pawimawh thu sawi bawkin, ram leh hnam hmangaihna kan lanchhuahtir dan hi a huau huau zawng nilovin, thui tak leh fing taka ngaihtuah a tul a ni, a ti a. Mizoram chu market economy thangduang tak a siam turin hmalak puiah vawiina kalkhawmte chu a sawm a ni.

Finance Minister chuan vawiin huna sawrkar department atangin leh mi taima leh a ngaihna hria kalkhawm ten ram economy than theihnan a ngaihdan te thawh a sawiho tura an kalkhawm chu lawmawm a ti a. NEDP hnuaia Entrepreneurship tihhmasawnna kalpui mekah mi tum ruh tlat, sawrkar tan thawhpui nuam tak an awm thu leh, chu chuan Mizoram economy-ah pawh zawi zawiin nghawng tha a nei chhoh zel tur thu a sawi a ni. Minister Pu Lalsawta chuan state economy pawh a ziaawm chhoh tak viau thu leh, tunah chuan Mizoram chu ei tawk tawk subsistence economy nilovin market economy a siam turin sawrkarin hma a lak mek thu a sawi a. Chumi tur chuan sawrkarin mi remhria leh taima te puih a remchanna siamsak lam a thawk ang a, mipui lamin eizawnna kawng tha leh tluantling tur an ngaihtuah in an dap ve thung dawn a ni, a ti a. Hmuingil taka market economy a luh a, chhungkaw tin in eizawnna ngelnghet neih theih nan sawrkar chuan theihtawp a chhuah mek thu Finance Minister hian a sawi a ni. 

Economic Conclave hawnna inkhawm hi Dr. C. Vanlalramsanga, Planning Secretary chuan kaihruaiin, ramin hma a sawn dawn chuan harsatna pumpelh tum ringawt lova harsatna chinfel tum zawkte, kalphung ngaia duhtawk mai lo a, thil thar leh chin dan thar tha zawk ngaihven peih te a ngaih thu a sawi a. Pu Sailhlira, Principal Adviser, Planning & Programme Implementation Department chuan lawmthu sawiin hun a khar a ni.

Mizoram Conclave hi chhawng thum a kalpui niin, hawnna inkhawm hi Technical Session pahnih in a chhawnzawm a. Mizoram State Planning Board (MSPB) Expert Member Prof. Lianzela leh Pu Vanlalchhawna ten Technical Session hi an kaihruai a. Dr. James L.T.Thanga, MSPB expert Member hovin Agriculture leh a kaihhnawih eizawnna kawngin Mizoram hmasawnna atanan thawh leh hmalak zel dan tur te ngaihthlak a sawiho a ni a. Dr. Laldinliana Varte, MEDMOC Expert Member hovin Entrepreneurship lama hmawsanna chungchang sawi a ni bawk.

Vawiin Conclave-ah hian NEDP hnuaia Entrepreneurship Development Scheme hnuaia entrepreneur thar ten an thilsiam leh hmalaknate Conclave chhimtute hmuh theihin an phochhuak a ni.