Thingkah khelmuala sak ‘Phuncong Run’-a April ni 4 zan atanga tan Young Lai Association (YLA) General Conference vawi 28-na chu nizan khan Lawngtlai West bialtu, AH & Vety Minister Pu C. Ngunlianchunga leh Lawngtlai East bialtu MLA Pu H. Zothangliana te’n an hmanpui a. Minister hi a nupui Pi KR Chhingpuii leh LADC-a Executive Member leh MDC eng emaw zatin an tawiawm.
Pu C. Ngunlianchunga chuan YLA General Conference chhimtu zawng zawngte chibai bukin, duhsakna a hlan a. Lairama tlawmngai pawl lian ber YLA chuan ram leh hnam hmasawn nan theih tawp chhuah zel se a duh thu a sawi. YLA General Conference thupui “Ram le miphun humhaak (Ram leh hnam humhalh)” chu thupui pawimawh tak, ngaihthah thiang lo a nih thu sawiin, YLA chuan thapui thawha a bawhzui ngei a beisei thu a sawi a. Ram leh hnam humhalh tur chuan mahni tawng humhalh leh hman uar te, mahni hnam inthuamna chawi lar te, mahni intodelh, rinawm, taimak, tuarchhel, tumruh leh nun uluk a ngai tih sawiin, pawn lam atanga chim ralna ai chuan mahni leh mahni intihchhiat a hlauhawm zawk a, hnam ralna bul a ni zawk tih a sawi. Pu C. Ngunlianchunga hian CYLA kutah Conference tanpuina sumfai a hlan nghal bawk.
Pu H. Zothangliana pawhin pi pute nun mawi tam tak chu thangtharte’n kan thlau thla tial tial tih sawiin, aia upa zah te pawh inzirtir thar a tul hle tih a sawi a. Sum ngainat leh duham lutuk avangin ram hmasawnna a thuanawp phah theih thu sawiin, ram leh hnam humhalh nan sum ngainat lutuk loh te pawh zir a ngai, a ti a. Ram siam tha tur chuan a bul tan nan mahni insiam that phawt a tul a ni, a ti.
Nizan vantlang inkhawm hi Central YLA Treasurer Pu C. Hrangthianga’n a kaihruai a. BCM Lawngtlai Area Executive Secretary Rev. R. Lalbiakliana chuan hunserh a hmang a. CYLA President Pu J. Sangthangpuia chuan thu sawiin, ram leh hnam kalsiam her rem nan thalaite’n kan ngaihhlut zawng kan thlak a, kan siam rem a ngai, a ti a. Inpumkhatna nen hnam thil vei tlanga lungrual taka ke pen a tul, a ti. He hun hi Mara Thyutlia Py (MTP) General Hqtrs hruaitute paw’n hmanpuiin, President Pu PP Zalena chuan chibai bukna leh fuihna thuchah a sawi a. Zoram khawvela Lai hnam tihmingthatu mi pali hnenah YLA hminga chawimawina hlan niin, mi eng emaw zat hnenah YLA Life member nihna hlan a ni bawk a. YLA Branch hrang hrang atangin zaipawl, malzai, hnam lam leh lemchan te ngaihthlak a, thlir ho a ni.
YLA General Conference vawi 28-na hi April ni 4, 2018 (Nilaini) zan khan palai lawmna inkhawm buatsaihin tan a ni a. Nimin khan chhun lamah YLA Hall, Thingkahah rorel inkhawm buatsaih niin, hemi rual hian pandal (Phuncong Run)-ah rorel lote tan hun hman a ni a; zan lamah pandal-ah vantlang inkhawm buatsaih a ni bawk. Vawiin lam khan rorel inkhawm buatsaih zui niin, chawhnu lamah kum 2018-2020 chhung Central YLA hruaitu tur thlan a ni a. Zanin hian vantlang inkhawm buatsaih leh niin, Conference hi a tiak ang.
Tun dinhmunah YLA-ah hian member 46,252 an awm mek a. Central YLA hnuaiah Sub-Hqtrs 4, Group 8 leh branch 107 a ding mek a ni. He Conference-ah hian kum 2018 chhunga YLA budget atan Rs nuai 20 ruahman niin, Kum Thupui atan “Faina leh Thianghlimna” tih chu thlan a ni a. Kum 2020 General Conference chu Lawngtlai College Veng Branch in an dawl ang.
