No.985/2020-2020

Vawiin khan Aizawl D.C. Pu Vanlalngaihsaka, I.A.S. hovin ama office chamber-ah Aizawl khawpui chawmtu tui lakna ber Tlawng Lui tihbawlhhlawh chungchangah meeting pawimawh tak neih a ni.

Tlawng lui hnara Reiek kawngdung hmun thenkhatah leivung leh bawlhhlawh paih nasa lutuk avangin Aizawl khawpui chawmtu tui lakna a tihbawlhhlawh nasa hle a. Hei hian harsatna namen lo a thlen a, PHE Department tui tihfimna pawh hun engemaw chen a ti khaihlak nghe nghe a ni. Hemi avang hian Aizawl D.C. hovin vawiin khan a kaihhnawih sokar department official-te bakah Local Council leh NGO aiawhte thukhawmin hmalak dan tur an sawi ho.

Vawiin meeting-ah hian AMC-in leivung leh bawlhhlawh dang paihna hmun atana a lo ruahman tawhte chu a huhovin department/NGO hrang hrangten a hmunah enho vek nise tiin rel a ni a. Leivung leh bawlhhlawh dangte chu a hmun lova paih chungchangah mipui leh chhungkaw tin hnenah media hrang hrang kaltlangin inzirtirna nasa zawka pek nise tih leh Construction & Demolition (C&D) Waste Management Rules, 2016 hmangin Dan bawhchhiaa a hmun lova leivung leh bawlhhlawh paihte chu an permit cancel hial turin meeting-ah hian rel a ni. Construction & Demolition (C&D) Waste Management Rules, 2016 chuan insakna leh thiahna, Construction work eng pawh atanga bawlhhlawh chhuak, leivungte, thing nawi, thir nawi, brick, cement ningnawi eng pawh a huam a ni.

Vawiin D.C. kaihhruainaa meeting neihah hian ni 13.5.2020 (Nilaini) khian AMC-in leivung leh bawlhhlawh dangte paihna hmun tura a ruatte chu a hmuna enfiah turin a thawh khat nan Aizawl D.C. Office atangin Verification Team an feh chhuak dawn a ni.