405/2023-2024

Aizawl the 11th May, 2023: Vawiin khan Aizawl District Water and Sanitation Committee chu an Chairman Dr Lalhriatzuali Ralte, Aizawl DC hovin a pisaah an thukhawm. Aizawl District chhunga khaw hrang hrang leh Aizawl khawpui chhunga faina leh tuihna humhalh kawnga hmasawn dan tur sawihoin ruahmanna te an siam a ni.

Aizawl DC chuan Mizoram chhung khaw hrang hrang te leh a bik takin Aizawl khawpuiah a kum telin tui a vang telh telh a, ram ngaw kan thiah zel avang te, sik leh sa inlumletin a thlen leh chhan tam tak vanga tui harsatna kan hmachhawn mek hian ziaawm lam a pan theih nan tan lak a tul tawh tak zet, a ti a. Sawrkarin hma a lak mek dan te puangzar a, mipuiin tui renchem leh tui khawl dan te, tuihna humhalh dan te, faina chungchang leh bawlhhlawh paih fimkhur a ngaihzia te inzitir a, a taka kan nunpui a hun tawh hle a ni, a ti.

Chhungtin ten anmahni inchhungah tui connection an dawn theih nan sawrkar chuan hma a la a. Jal Jeevan Scheme hnuaiah Aizawl District chhunga khaw hrang hrangah tui pekna tur PHE Department chuan a buaipui a. Khaw 64 zingah khaw 16 tan solar pumping (ni zung chakna) hmangin tui lakna a siamsak mek a. Pu H.Lallianmawia, Sr. EE, PHED, Rural Watsan Division report-a a lan danin solar pump hmanga tuipekna tur buatsaih hna hi za zelah 60 vel thawh zawh tawh a ni a, a bak hi 70 atanga 80% thawh zawh tawh a ni bawk. Thingtlang khuaah te hian water pump hmang lovin tui hi gravitation hmanga lak a ni thin a, tui a kam chak tak hle avangin khaw tam takah pumping system hman a lo tul ta a. Heng hmunah te hian nizung chakna hmanga tui pump-na siam niin environment chhe zel tur ven nan leh sum tam tak luang ral tur hum nan a tangkai hle.

Aizawl District chhunga school leh Anganwadi bakah biak in leh community hall hrang hrangah te tui connection hi pek a ni a. School leh Anganwadi bikah hian za ah za connection pek an ni tawh tih meeting ah hian tarlan a ni.

Aizawl District hi Open Defecation Free (ODF) plus a kai theih nan tan lak dan tur te ngaihtuah a ni bawk a. Samlukhaiah Community Sanitary Complex sak zawh tawh a ni a; Samtlang, Sailam leh Sihphir ah te sak mek a ni a. Plastic Segregation House hi Aibawkah sak mek a ni a. Community Compost pit hi Aibawkah unit 34, Tlangnuamah unit 17 sak zawh tawh a ni. Community Soak Pit hi Aibawk block ah 89, Tlangnuamah 46 sak zawh tawh a ni bawk.

Vawiin meeting chuan Water and Sanitation Mission chak leh zuala kalpui a nih theih nan Mission Zotuithiang neih ni se, tiin a rel a. He mission hnuaia hma lak dan tur duang turin PHED Sr. EE Pu H.Lallianmawia kaihhruaina hnuaiah sub-committee din ni se, a ti bawk. Khaw hrang hrang te tlawh kualin chin dan tha zawk inhrilh tawna, mipui zingah awmze nei zawka awareness campaign te nei turin ruahmanna an siam dawn a ni.