269/2023-2024
Kan hriat leh kan hmuh angin tun hnai ah khua a lum chho leh ta hle mai a, mipui te tui hmunah chhungkua leh thian ho intihlim a hun hmang turin kan kal nasa hle a. Heng hmunah te hian tui tla leh chesual nunna hlu tak chan an awm leh thin hi a pawi hle mai a. Heng laka kan fimkhur nan leh chhiatna thleng thei laka kan lo him zawk nan a hnuaia ‘tih tur leh tihloh tur’ te hi kan hriata kan zawm a pawimawh hle a ni. Veng/Khua theuhah mipuite kan him zawk nan a tul ang a hma la tur leh zirtirna a tam thei ang bera in pe turin kan in ngenin kan in hriattir e.
1. Lui kal dawnin tui thiam ngei hruai tel thin ang che.
2. Tui thiam nih loh chuan Tui chen loh tur a ni.
3. Lui kalna tur hrechiang hmasa in, Lui a thuk em tih leh tui chenna atan a him tawk em tih
hre chiang hmasa ang che.
4. Lui a kal zat hriatchian tur a ni a. Kan kim em tih in chhiar thin tur a ni.
5. Tui thiamlo kal kan nih chuan Life Jacket/lan theihna chi ken tul tur.
6. Tui tla an lo awmin kan hleuh thiamlo a nih chuan tui ah zuan luh ve ngawt loh tur. Tui thiam te emaw Tanpui tu arang lama zawn hmasak zawk tur a ni.
7. Tui tla an awm in, tui kan hleuh thiamlo a nih chuan Vau kam atangin hmawlh sei emaw,
mau sei emaw hmanga an mahni pawh chhuah theihna tur siam tur.
8. Suar dai kai a ngaihin a khauh lai kher ah dai kai lo in, a thuklo lai leh tui khauhlo lai zawn
hram hram tur.
9. Rui chungin emaw, harhfimlo in tui chen/tui a luh loh tur a ni.
10. Tui zang khauhna hmunah tuman tui chen loh tur a ni.
11. Lui dung a kan kal in khawchin ngaihchan thin tur a ni. Saberekakhuangkaih thleng thei lakah fimkhur tur a ni.
12. Balu lak hmanga eizawng te’n Balu kan lak in hmun khat a mi thuk deuhin lak loh tur a ni.
13. Lui kan kalna hmun ah harsatna kan tawh pawha hriattirna kan pek zung zung theih nan inbiakpawh theihna hmun (Phone signal thatna hmun) ah te kal nise.
Tui a chesual an awm in a bul hnai Veng/Khuaa tui thiam awmna te a rang lama hriattir thin tur a ni. Tin, Emergency Response Support System (ERSS) Toll Free Number : 112 leh District Disaster Management Authority chuan darkar 24 chhung District Emergency Operational Centre toll free number: 1077 chhiatna thleng report-na tur a buatsaih bawk.
