270/2023-2024

Ni 29.04.2023 (Inrinni) khan AH& Vety Dept. Minister Er. Lalrinawma hovin 'World Veterinary Day 2023' chu Tuma Resort, Bungbangla ah hman a ni a. Kumin Veterinary Day 2023 thupui atan hian 'Promoting Diversity, Equity and Inclusiveness in the Veterinary Profession' ti hman a ni.

Khuallian AH&Vety Minister Er. Lalrinawma chuan 'World Veterinary Day' hman theih a nih chu lawmawm tiin AH&Vety Department-a thawktute chu mipui tana thawk hlawk tak leh ei leh bar kawng nasa taka thawk tawh thintu an a ti a, chutih rual chuan an hnathawhna kawng apiangah mahni mihringpuite hlutna hre reng chunga hma la thin tur leh an ran enkawlte pawh an hlutna hriat a pawimawh a ti. Mite ranvulhte enkawl sakna kawngah pawh a neitute rilru hriatthiampui a pawimawh a, eitur atana ran an vulhte pawh a sa thianghlim leh hrisel an chhawpchhuah sak theihna tura uluk taka enkawl a pawimawh hle a ni a ti bawk.

Minister Er.Rinawna chuan Vety Department chu Mizoram tan department pawimawh leh hlu tak an nih angin mipuite hnenah pawh zirtirna leh hmalakna puanzar kawngah tun aia tanlak ni theih se a duhthu a sawi a, chutih rual chuan Pathianin mihring leh thildangte a siam danah ran vulhte laka ngeineihna lan tir tura tih a nih lain hmun thenkhatah ran tihduhdahna leh sawisakna te a la thleng thin chu Animal Welfare Board Chairman a nihna ang pawhin pawi a tih thu a sawi bawk.

'World Veterinary Day 2023' lawmna inkhawm hi Indian Veterinary Association bultum niin Dr. Lalremliana, President IVA chuan he hun kaihruaiin, IVA Mizoram Secretary leh Finance Secretary atangin report ngaihthlak a nih bakah Dr.C Lalmuanthanga, Asst. Professor, CVSc &AH, CAU, Selesih chu Resource Person atan hman a ni. Dr. Jonathan Lalsiamthara Ralte, Researcher, Molecular Microbiology & Immunology School of Medicine, Oregon Health & Science University, USA atangin thusawi ngaihthak a ni bawk a. Dr. Robert Rualthankhuma, Vice President IVA in lawmthu sawiin hun hnung a khar a ni.