271/2023-2024

Kolasib dated 1st May 2023: Vawiin chawhma khan DRDO Conference Hall, Project veng, Kolasibah Pu John LT Sanga, Deputy Commissioner hovin lirthei hmang a eizawng pawl hrang hrang hruaitute, khawtlang leh tlawmngai pawl aiawhte leh Kolasib District Consumer Union hruaituten lirthei hman man ennawnin thutkhawmna an nei a. Pu B.Lalchuangkima, District Transport Officer chuan State Transport Authority pawmpuina hnuai a Kolasib district chhung a lirthei hman man bithliah dan sawi zauna hun hmangin Pu Lalrinawma Traite, SP, Kolasib pawh he hun ah hian a tel a ni.

Pu John LT Sanga, Deputy Commissioner chuan litrhei hman man bithliah dan ennawnna chuan mipui nawlpui a nghawng theih avangin thil tam tak ngaihtuah tel chung a ruahmanna siam a tul thu a sawi a. Kum tin a thil man san dan leh khawsak phung hautak dante thlir chungin lirthei khalhtute dinhmun saimthat chu thil pawimawh tak a nih thu a sawi a, hetih rual hian lirthei khalhtute chu mipui tan a rawngbawlna pawimawh tak thawktu an ni tih inhriat a pawimawh thu Deputy Commissioner chuan a sawi bawk a ni.

Kolasib district-a lirthei hman man bithliah ennawnna hnuhnung ber chu February ni 1, 2021 khan neih niin chumi zulzui a State Transport Authority-in Rate a bithliah chu September ni 1, 2021 atang khan hman tan a ni a. Thutkhawmnaah hian Bus, Maxi Cab, Taxi leh Auto rickshaw hman man te ennawn niin mi pakhat zel ah Maxi Cab hman man chu Kilometre khat ah Rs. 4.35, Taxi hman man Kilometre ah Rs. 50, Auto Rickshaw hman man Kilometre ah Rs. 40 leh Bus hman man Kilometre ah Rs. 4 angin State Transport Authority-ah rawtna siam ni se tih rel a ni.