3679/2024-2025

January ni 6, 2025: Election Commission of India thuchhuak angin Mizoram pumah Photo Electoral Rolls Special Summary Revision, 2025 neih a ni a. Aizawl District Bawrhsap, District Election Officer ni bawk chuan vawiin khan Aizawl District atana Final Electoral Roll chu DC Conference Hall-ah mipuite en theih turin a tlangzarh.

Aizawl DC chuan Electoral Roll ennawnna, Second Special Summary Revision of Photo Electoral Rolls, 2025 neih dan kalphung tlangpui sawiin, tluang tak leh hlawhtling taka neih a nih theih nan a fimkhur tak leh thahnemngai taka thawktu ERO, AERO leh BLO, Local Council, V/C, Political Parties, tlawmngai pawl hrang hrangte leh Media te chungah lawmthu a sawi a ni.

Aizawl District-ah Assembly Constituency 12 a awm a, Dt 29.10.2024 leh 28.11.2024 chhung khan hming thunluh ngai, paih ngai leh siamthat ngaite tan dilna hun hawn a ni a, heng dilna lutte hi Dt. 24.12.2024 thleng ERO/AERO ten a hmunah kalin hearing neih a ni.

Final Electoral Rolls, 2025 ah hian Aizawl District ah hian Voters 2,92,115 awmin mipa 1,36,350 leh hmeichhia 1,55,765 an ni a, mipa aia hmeichhia an tamna chu 19,415 a ni. Draft Photo Electoral Roll atanga Final Photo Electoral Roll a Voter punna chu 3153 (1.09%) a ni a. 13-Aizawl East-I (GEN) AC ah voter punna percentage a sang ber a, 2.33% a ni; 14-Aizawl East-II (ST) AC ah voter punna hi 0.30% niin a hniam ber a ni.

Aizawl District chhunga Voter tlemna ber Polling Station chu 7/26 - Chhanchhuahna Polling Station niin Voter 84 an awm a, Voter tamna ber chu 13/24-Zemabawk-VIII Polling Station niin Voter 1517 an awm.

Aizawl District-ah EPIC 100% coverage neih a ni (Roll a chuang zawng zawngte EPIC issue vek an ni).

Aizawl District huam chhunga Assembly Constituency 12-ah hian Polling Station 324 a awm a, average-a lakin Polling Station pakhat zelah Elector 901 awm ang an ni.

Aizawl District huam chhunga Assembly Constituency 12-ah hian Service Voter 1422 an awm a ni.

Election Commission of India-in ruahmanna a rawn siam angin, mi tupawh Final Electoral Rolls hi lei duh chuan Election Branch, Aizawl DC Office atangin a soft copy (without photo) Rs. 100/- in leh a hard copy phek khat Rs. 5/- zelin lei theih a ni. Amaherawhchu hard copy lei duhte chuan sawi lawk hmasak tur a ni a. A phek duh lai chauh lei theih a ni lo.