3680/2024-2025

Dated Serchhip, the 6^th January, 2025: Election Commission of India ruahman anga kumin January ni 1-a kum 18 tling chin te laa Serchhip District-a Electoral Roll siamthat hna thawh chu zawhfel niin vawiin khan Final Electoral Roll tarchhuah a ni.

Electoral Roll thar hi Serchhip DC Meeting Hall-ah Serchhip District Election Officer leh Districty Bawrhsap Pu Paul L. Khuma chuan tlangzarhin tun tuma Electoral Roll ennawn hna hi uluk taka kalpui a nih thu sawiin, hemi atana thawktu hrang hrangte hnathawh chu fakawm a tih thu a sawi a. Gender Ratio-ah mipa leh hmeichhia an inthlauhna sang zel chu ngaihtuah zui ngai tak nia a hriat thu a sawi bawk.

He hunah hian Election Officer Pi F. Lalnisai chuan Electoral Roll tlangzarh tak dinhmun tlangpui sawiin, Serchhip District-ah hian Assembly Constituency pathum (3) awmin Polling Station 88 a awm a, Vote nei thei General Voters 54,927 (Mipa 26,583 leh Hmeichhia 28,344) leh Service Voters 365(Mipa 360 leh Hmeichhia 5), an vaiin Vote nei thei mipa 26,943 leh hmeichhia 28,349; an vaiin 55,292 an awm a. Tun tum Electoral Roll ennawn-a Draft Roll tarchhuah aiin Vote nei thei hi 634 in an pung a ni.

Final Electoral Roll hi ni 6.1.2025 atang hian mipuite en theih tura tar chhuah nghal a ni a. Mi tupawh a en duh chuan an bialtu Electoral Registration Officer (ERO), Asst. Electoral Registration Officer (AERO), Booth Level Officer (BLO) leh Election Branch, DC Office ah Office hun chhungin en theih a ni ang.