Aizawl DC leh Chairman, Swacch Bharat Mission (Grameen) Aizawl District ni bawk Pu Vanlalngaihsaka, IAS chuan vawiin chawhnu khan Aizawl DC Conference Hall-ah Aizawl District a thingtlang khua te thianghlimna survey, Aizawl District tana Swacch Survekshan Grameen 2019 hawnna programme hmanpuiin he programme hi a launched a ni.

Aizawl DC Pu Vanlalngaihsaka chuan nikum Swacch Survekshan Grameen 2018-ah Aizawl District chu North East Zone pumah dinhmun 2-na a hauh thu tarlangin mipui atanga ngaihdan lakkhawmna ‘feeback’ ah hmu tha sela chuan Aizawl District chu ram pum huap level-ah a lan theih thu a sawi a, feedback lamah score sang zawk a awm theih nan mipuite chu theihtawp chhuahpui turin a sawm a ni.

Faina leh thianghlima ngaih pawimawh a tul zia a sawinaah Pu Vanlalngaihsaka chuan faina leh thianghlimna hi mitin in kan nunphunga kan neih a ngai a, a week chhung emaw, a programme kan hman chhung emaw chauha ngaipawimawh lovin nitina kan tih tur ngei ngei thilah kan dah a tul a ni, a ti. Faina leh thianghlimna kawnga hmahruaitu chu Sawrkar leh Department te nimahse kan zavaia telna programme ani tih hi mipuiin kan hriat thar leh kan hriat nawn fo a ngai a ni, a ti bawk.

SBG 2019 Aizawl District Launching programme hi Pu Lalrammawia, Executive Vice Chairman, SBM (G), Aizawl District leh SE, PHE Department ni bawk chuan kaihruaiin Pu C. Zothantluanga, Member Secretary SBG(G) Aizawl District leh EE PHE Department Rural WATSAN Division, Aizawl chuan SBG 2019 kal dan tur te, survey thil tum leh  survey tehfung te sawifiahin hun a hmang a ni.

'Swachh Survekshan Grameen - 2019' hi August ni 14 khan New Delhi-ah Pu Gajendra Singh Shekhawat, Hon'ble Union Minister, Ministry of Jal Shakti-in a hawng tawh a. Mizoram huapa he programme hawnna chu August ni 21, 2019 khan Deputy Chief Minister Pu Tawnluia hoa neih a lo ni tawhin Aizawl District huam chhunga RD Block 5 ah pawh September kar hmasaber chhungin neih tum a ni.

Aizawl District-ah hian kawh 22 endik a ni dawn a, heng zinga khaw 15 chu survey endiktu a ruat IPSOS Pvt. Limited chuan an endik tawh a ni.

India rama chengte fai leh thianghlim (Sanitation) lama hma an sawn theihna turin India sawrkar chuan kum 1986 a tang khan hma a lo la tan tawh a. Kum 2014 a tang khan Swachh Bharat Mission hming vuahin nasa zawkin hma ala chho ta a. He programme hi thuanghnih: thingtlang (Rural) leh khawpui (Urban) ah te then niin Thingtlang (Gramin) hi PHED in a enkawl a, khawpui (Urban) hi UD&PA Department lamin an enkawl thung a ni. He programme ina a tin zawn ber chu, 'chhia leh tha hriatnain miten fai leh hrisel duhna thinlung an nei ang a, phut leh beisei awm lovin hriselna atan an thawk dawn a ni' tia kalpui a ni, hei hi 'Mission Mode' an ti a ni.

He programme hian a tum ber chu kumin October ni 2, India hnampa Mahatma Gandhi piancham vawi-150-na a thlen ni hian India ram chuan India Fai (Clean India) a thleng hman tur a ni tih hi a ni.

He hmathlir nei chung hian sawrkar chuan rampum hi fai leh thianghlim (Sanitation) in a tuamchhuah hman ngei tur a ni tih te, tun kan dinhmun aia hmasawn tur leh khawlaia inthiar awm lo (ODF) turin theih tawpin hma a la a ni.