Nimin Ni 21.04.2016 (Ningani) a Pu Kannan Gopinathan, DC Aizawl hova SP, PWD (Road), UD&PA leh G&MR aiawh Official thukhawm chuan Aizawl khawpui leh a chhehvel hmun hrang hranga leivung paihin harsatna a thlen thin chungchang thlir hona an nei.

Phalna nei lo leh remchang lai apianga leivung leh bawlhhlawh paih thin hian kawr leh culvert a hnawhin, kawngpui a tichepin a tichhe nasa hle tih hriat a ni a. Khawpui chhehvel hmun thenkhat -World Bank road, NH-54 (Rangvamual) leh Zokhawsang ah te mimal phalna a man chawia paihna hmun a awm thu sawi lan a ni bawk. Heng hmunah te pawh hian kawngpui kama paih fai loh cham bang tam tak awm thin chu ngaih mawh awm an ti hle a. Leivung paihna hmun bik ruahman leh uluk zawka enfel nise tia rel a ni.

Hetianga phalna nei lova leivung leh bawlhhlawh paihte hi dan anga hrem theih anni a. PWD lamin hmun thenkhat hnawk sak zual an hriatte pawh CrPC Section 133 anga hmalak nghal nise tia rel a ni. Hetianga phalna neilo leh vantlang tana hnawhsak a paih hria chuan District Magistrate emaw Police hriattir thin turin mipuite an ngen a ni.