Vawiin khan Middle School Teachers' Assn.(MSTA) Jt. Hqrs, Lunglei Conference vawi 10-na chu SSA Recreation Hall Lunglei ah neih a ni.

He hunah hian Pu Joseph Lalhimpuia, Parliamentary Secretary i/c School Education chu Khuallian a ni.Pu ZD Lalfela, President, MSTA chuan inkhawm kaihruaiin, Khuallian Pu Joseph Lalhimpuia chuan vawiina he huna khuallian a an sawm avangin MSTA hruaitute leh zirtirtute chungah lawmthu a sawi a, Mizoramah zirna lamah hmasawnna tam tak hmuh zel a nih chu a lawmawm hle a ni, a ti.

Primary leh Middle School-ah zirtirtu subject bik nei a hna an lak ngai loh chu nikum atang khan subject a bik in science leh mathemetics ah zirtirtu za chuang lak an ni a, zirtirtu indaihlo kan tih thin te pawh hnawh khat zel kan tum a ni, a ti bawk. Sawrkar hian zirna hi a ngai pawimawh hle a, MLA Fund hi a bikin Health leh Education lam atan hman theih tura tih a ni bawk, a ti. Lunglei District bik atan School repair leh sak that nan crore 1 sum dah a ni a, Guest House zirtirtute thlenna tur cheng nuai 120 pawh a awm sa tawh a ni a; Education Complex siamna tur pawh kalpui mek a nih thu a sawi bawk.

Pu Mahima chuan zirtirtute hi naupang nungchang hrechiangtu an ni a, naupang siamtha theitu leh tumruhna pe theitu an ni a, chumi ti thei tur chuan tih tak takna thinlung nei theuh i tum ang u tiin MSTA member-te a fuih. MSTA te tanhona a fakawm tiin pawl anga an lungrualna leh inpekna chhawm nung zelin Mizoram zirna hmasawn nan i tang ho zel ang u, a ti.

Vawiin hian MSTA 2016 - 2018 chhung a hruaitu tur thlanna neih ani a, President - ZD.Lalfela, Sr.Vice President - C.Lalthansanga, Vice President - C.Lalhmangaihzuala, Secretary - Malsawma. Sailo, Jt.Secretary - V.Lalrinmawia, Secretary i/c information & publicity - K.Lallawmpuia, Treasurer(General Fund) - C.Saikhuma, Treasurer(Endowment) - Rohmingthanga Ralte te an ni.