Vawiin khan Sports & Youth Services Department buatsaihin Champhai District chhunga infiammi mi 60 hnenah kum li chhung (2012-2016) Inter State, National Level leh Common Wealth huapa intihsiakna hrang hranga titha (medal winner)-te hnena Incentive Cash Award hlanna hun I&PR Auditorium-ah neih a ni a. He hunah hian Parliamentary Secretary Pu TT Zothansanga chu khuallian niin, Champhai DC Pu Vanlalngaihsaka leh Officer dang thenkhatin an tawiawm a. Pu Zothanmawia, Director, Sports & Youth Services chuan a kaihruai a ni.

Khuallian chuan mahni inthununna, insumtheihna leh thawhrimna hi tunlaia kan mamawh ber anih thu sawiin, vawiina kalkhawmte chu chutiang ang mite an nih thu leh, an hlawhtlinna chungah lawmthu a sawi a. An lawmman dawn chu bultanna ah hmang tura a duh thu leh, hmasawnna kawng an zawh zel naah infiamna hi eizawnna tlak ani thei tih hre reng chungin inthlahdah lo turin a chah a. Parliamentary Secretary chuan Champhai District chu hman atang tawhin infiamna khawvelah a thawh hlawk thin thu sawiin, thangtharte pawhin chu chu chhawm nung zel tura a duh thu a sawi a. Sorkar pawhin Champhai District chu duhsakin, indoor stadium te, football field leh sports stadium bakah tennis court leh infiamna hmun tha tak tak te a siam sak tawh bakah siam mek thu a sawi a ni.

Ram thang zela hmasawnna kawng kan zawh naah hian mitin in tih theih kan nei ani, tiin Pu TT Zothansanga chuan mahni mimal hlawkna ringawt um lovin ram hmasawnna tur anih chuan kan theih chin zela tan kan lak theuh a ngai a ni, a ti a. Tuna New Champhai leh Zotlang inkar kawng siam that mekah kawngsir tawn tawna leilet neituten phut let nei miah lova kawng a lo zau zawk theih nana ram an pe phal chu chawimawitlak a tih thu a tarlang bawk.

Hun kaihruaitu Pu Zothanmawia chuan Mizo thalaite hi infiamna khawvelah National level mai bakah khawvel huap infiamna – Olympics thlenga tel thei turin theihna an neih thu sawiin, vawiina lawmmawn an dawn tur pawh “incentive” anihna ang taka an hmabak ah tha lehzual a phur tak chunga an thawh a, hlawhtlinna an neih theih nana pek an nih thu a tarlang a. Sports & Youth Services Department hmalakna hrang hrang hnuaiah leh association hrang hrangte leh mipui tawiawmna zawng zawng avanga infiamna khawvelah Mizoramin nasa taka hma a sawn chu lawmawm a tih thu sawiin, thalai infiamna kawng zawha eizawnna hlawhtling tak a siam ta entawntlak tam tak an awm chhoh zel thu a tarlang a ni.

Vawiin hunah hian Chanphai District Sports Committee Secretary chuan thu sawi bawkin, Committee hian medal winner-te hi lawmpuina thuziak a hlan theuh bawk a. Pu Lalngilneia Colney, District Sports & Youth Officer chuan lawmthu sawiin hun tawp a siam a ni.

Champhai District-a incentive Cash Award sem hi sports discipline hrang hrang 12 (Athletics, Boxing, Taekwondo, Badminton, Kick Boxing, Weightlifting, Wrestling, Karate, Wushu, Hockey, Judo leh Football)-ah mi 60 in medal 119 an dawng a, official pathum an awm bawk. A vaiin cheng nuai sawmli semchhuah a ni a. Tournament leh Championship azirin pawisa dawn hi a inanglo hlawm a. An zinga pawisafai dawng hnem ber F. Lalrempuii, Khawzawl (Taekwondo) chuan competition pariat a telna atangin Rs. 3,75,000 a dawng a ni.