Vawiin khan Mizo Zirlai Pawl Hqrs Lunglei chuan Saikuti Hall-ah General Conference vawi 2-na leh hruaitu tharte thlanna an hmang a, Education Parliamentary Secretary Pu Joseph Lalhimpuia chu Khuallian niin he hun hi a hmanpui.

MZP Conference Vice-President Lalrammuanawma Fanai kaihhruaiah Khuallian Pu Joseph Lalhimpuia chuan MZP member kalkhawm zawng zawngte chu Education Department hmingin chibai bukin Mizorama zirna tihmasawnna kawngah sorkar hmalaknate chu zirlaiten theihtawpa an thlawp thin avangin lawmthu a sawi a. Kum 2 chhung Education department a enkawl chhungin hmalakna engemawzat kalpui mek a ni tih sawiin Pu Joseph Lalhimpuia chuan Mizorama zirna sikul a awm tan tirh atanga la awm ngai loh subject bika zirtirtu ‘subject teacher’ tur lak tan a ni a, chubakah zirna in hrang hrang hostel neite leh private hostel-te mumal zawka kalpui an nih theih nan ‘Hostel Rules’ pawh Cabinet chuan pawm tawhin Notification chhuah vat a beisei thu a sawi bawk a. Veng/Khua pakhatah sorkar sikul awm, zirtirtu indaihloh leh zirlai naupang nei mang lote chu pawhkhawm (amalgamate) an ni ang a, zirtirtute pawh chung amalgamated school-ah te chuan zirtirtute pawh dah nghal vek tum a ni, a ti. Lunglei-ah Primary School engemawzat chu ‘model school’ atana thlan tawh niin Mizoram hmun danga la neih lo Lunglei-a JNM M/S chu ‘model school’ atan thlan niin he sikulah pawh subject hrang hranga zirtitu thiam tak takte thlang khawma dah tum a nih tur thu a sawi bawk. Thawhrimna tel lova hlawtlinna hi a daih rei lo tih hre renga zirlai zawng zawngte chuan an lehkha thiamna te chu mi hmantlak ni tur leh ram leh hnam tihhmasawn nan hmang turin a fuih a, zirna lamah hmasawnna chu Lunglei hmasawnna atana thil pawimawh ber pakhat a ni, a ti.

Vawiina MZP Hqrs Lunglei General Conference-ah hian President Benjamin Vanlalfela-in thu a sawi bakah Secretary K.lalremruata chuan kum 2014-2016 chhunga an hmalakna hrang hrang Report a tarlang bawk a. October ni 27, 1935-a din Mizo Zirlai Pawl Gen Hqrs. hnuaia awm MZP Hqrs Lunglei te chuan Lunglei District chhunga zirlaite hmasawnna ngaihtuahin kawng hrang hrangin awareness campaign neiin zirlai tithate chawimawina hun an hmang thin bawk a. MZP hruaitute chuan zirlaite hmathatna tur leh an chanvo dik an chan theih nan Mizo Zirlai Pawl chuan theihtawp a chhuah zel tur thu an sawi bakah, zirna leh thiamna hmanga ram leh hnam atan rawngbawltu tha ni thei turin zirlai kalkhawmte an fuih bawk a ni.

Parliamentary Secretary Pu Joseph Lalhimpuia hi nimin khan Lunglei lo thlengin, nizanah Zobawk Joint YMA Conference, Lunglepuizawl-ah Khuallian niin hun a hmanpui bawk a ni.