Ni 8.10.2018 khan Aizawl DEO, Dr. A.Muthamma chuan General Election to MLA, 2018 inbuatsaihna kal zelah Press Meeting a nei.  

Dr. A.Muthamma chuan Aizawl District ah Constituency 14 awmin, Returning Officer 7 leh Asst. Returning Officer 14 an awm ang, a ti a. MLA Election atan hian Flying Squad te pawh inpeih tawhin, Call Centre pawh hman theihin a awm tawh a ni, tiin a sawi a. Phone Number 1950 dial-in Call Centre hi a biak theih reng a ni, a ti bawk a ni. DEO chuan Electoral Roll a modification awm pawh Form 6 or 7 kenga BLO te hmu turin a ngen a ni. Mi zawng zawng huapzo Election neih tum a nih avangin, PwD (taksa lama harsatna nei te) ngaih pawimawh an ni ang, tiin a sawi a. Hemi atan hian MPF atangin volunteer pawh an awm ang, a ti bawk a ni.  Aizawl District a Polling Station 5 te chu hmeichhia chauh duty a, security personnel te pawh hmeichhia vek hman tura ruahmanna siam a ni, a ti a. EVM Randomization vawi thum tih tur chu, vawikhat tih tawh a ni, a ti bawk a ni. Aizawl District Constituency-ah hian Critical Polling Station 10 a awm a, videography leh security pawh uluk taka dah an ni ang, a ti a ni.

Polling Station 50 ah live webcasting a awm ang a, NIT leh NIELIT zirlaite'n webcasting ah hian a vawikhatna a tan an pui ang. Electronic Postal Ballot pawh hman a ni ang a, Counting Centre 5 a awm ang. Chungte chu Pachhunga University College (PUC), Govt. Aizawl College, Hrangbana College, Assembly Annex, R.Dengthuama Hall te a ni.

PUC ah Aizawl West-I, Aizawl South-I, Tawi, Aizawl North-I, Chalfilh, Tuivawl chhiar a ni ang. Govt. Aizawl College ah Aizawl South-II, Aizawl South-III; Hrangbana College ah Aizawl East-I,  Aizawl East-II; Assembly Annex ah Aizawl West-II, Aizawl West-III, R.Dengthuama Hall ah Aizawl North-II, Aizawl North-III chhiar a ni ang.