Vawiin khan DC Conference Hall, Aizawl-ah tun tum MLA inthlan lo awm tur atana inbuatsaihnan Aizawl district huamchhunga Electronic Voting Machine (EVM) te enchhinna ‘First Level Checking’ neih a ni a, Election Officer-te leh political party hrang hrang aiawhte te an tel a ni.

Election Officer, Pi H.Lalchhandami chuan kalkhawmte hnenah he enchhinna hi Election Commission of India (ECI) thuchhuak anga neih anih thu a sawi a, a kalhmang turte sawiin, zawhna leh sawiselna neite chu inthlahrung hauh lo turin a chah bawk.

He First Level Checking neihpui tur hian Electronic Corporation of India Limited (ECIL) atangin Engineer pahnih an lokal a, anni hian EVM te hi an that leh thatloh ngun takin an enfiah a ni. He hun chhunga Supervisor atan Additional DC, Pu Lalchungnunga leh Assistant Commissioner, Pi Pinky Zosangpuii te chu ruat an ni bawk. Election Commission of India hi a fimkhur em em a, tum danga la tih ngailoh, he First Level Checking-a Observer atan Director, Transport Department, Pu Thlamuana chu ruat a nih thu a sawi bawk.

He hunah hian Vote thlak chhinna (Mock Poll) neih a ni a, ECI in 2012-a thuchhuah a siam angin, EVM te hi za zela pangnga (5%) ah vote 1000 zel a enchhinna’n hian thlak a ni. He First Level Checking-ah hian EVM 450 vel enchhin tura ruahman a ni a, a hmunah hian CCTV dah reng a ni bawk. Master trainer pathum, C.Lalmuanpuia, MCS; S.T.Lalvensangi, MCS leh P.C.Zonuntluangi, MCS ten a hmunah an vil reng a ni.