3028/2022-2023
Aizawl, the 13th December 2022 : Kumtina neih thin ‘Registrars of Births and Deaths Annual Training’ chu Aizawl district AMC area pawn lam mite tan vawiin khan Directorate of Economics and Statistics conference hall, MINECO-ah neih a ni a; Dr. Lalhriatzuali Ralte, Deputy Commissioner & District Registrar of Births and Deaths, Aizawl District chu khuallian niin Pi B. Vanlalrengi, Deputy Chief Registrar of Births and Deaths & Deputy Director (CRS), Economics and Statistics in a kaihruai a ni.

Khuallian Dr. Lalhriatzuali Ralte chuan Registrar of Births and Deaths (RBD) training Covid avanga kum 2 neih tawh loh hnuah neih leh theih a ni chu lawmawm a tih thu a sawi a. RBD te hnathawh hi a pawimawhin a ropui em em a, intuaithar ngai reng a nih thu sawiin RBD hna chu sawrkar tan a pawimawh telh telh dawn a ni a ti. Digitized birth and death certificate pekchhuah a ni tawh chu lawmawm a tih thu sawiin Aizawl DC chuan hmasawnna ropui tak a ni a ti. Electoral roll-a birth certificate lem leh fel tawklo awm theite lakah nasa takin a pui dawn a, QR code hmanga felfai taka enfiah theih a nih tawh dawn avangin lawmawm a tih thu a sawi. Digitized certificate hi uar zawk leh huapzo zawkin campaign kalpui ni se, manual a nei sate pawhin digitized vek theih chuan a tangkai hle dawn a ni a ti. Birth certificate pawimawh zia sawiin India khua leh tui diktak te hriat hranna a nih piah lamah, Electoral roll hearing neih nikhuaah a pawimawh em em a, election thianghlim leh felfai tak neih theih nan a bikin tunlai raltlan tam lai hian fimkhur lehzual turin RBD kalkhawmte a chah a. Ram leh hnam humhalh nan leh electoral roll felfai leh thianghlim nei turin thawhhona tha a pawimawh thu a sawi bawk.

Pu B Lalrinhlua, Addl. Chief Registrar of Births and Deaths leh Director, Economics and Statistics ni bawk pawhin thusawiin mihring hmasawnna tehkhawng (Human Development Index) pathum te chu zirna, hriselna leh mimal sum leh pai dinhmun (per capita income) a nih thu sawiin zirtirtute chu hemi kawngah hian an thawhhlawk hle a ni a ti. Birth and death record piah lamah daily record an neih te hi hahthlak viau mahse department nasa takin a pui a ni a ti a. RBD kalkhawmte chu certificate pekchhuah chungchangah fimkhur lehzual turin a chah a ni.

Vawiin training programme-ah hian Aizawl District AMC area pawn lama Unit 72 awmah unit 65 atangin an tel thei a. Pu J. Ramdinmawia leh Pi Lalfakawmi, Inspectors of Statistics ten training an pe a ni.