2772/2022-2023
Aizawl District Bawrhsap Dr. Lalhriatzuali Ralte chuan mipuite fimkhur nan a hnuaia ziak ang hian thuchhuah a siam -

Kan hriattheuh angin Dt. 29.10.2022 khan Tuirial Airfield ah Tank Lorry MZ01 W3251 chu chesualin kawngpui ah a let a. Tank Lorry hian petrol ltrs 22,000 vel a phur ni a hriat a ni. Tanky atanga petrol leak chu accident thlenna bula awm te leh motor tlan lai amiten mu-leh-mal pawh awmlovin a remchan dan angin an dawh a. Chhiatna rapthlak tak, mi 11 lai in an boral phahna a lo thleng ta anih kha.

Tin, petrol phur Tank Lorry atanga mipuiten petrol bua kan lo dawh mai hi Dan mit ah chuan ruk rukna a ni a, hrem theih an ni. Chubakah petrol hi kang hma tak (highly flammable liquid) a nih avangin mipui in kan chim vak hi a him lo hle a ni.

Chuvangin, tun hnu ah hetiang chhiatna hi a thlen tawh loh nan District mipuite hriat turin thu ka chhuah e;

Petrol/Diesel phur Tank Lorry chetsualna emaw lirthei (Vehicle) chetsualna engpawh a thlen in a rang thei ang berin a chetsualna hmun Local Council/Village Council hruaitute hrilh hriat nghal tur a ni a. Local Council/Village Council hian an hnaih ber Police Station ah emaw, an mahni bialtu Zonal Magistrate emaw, District Emergency Operation Centre (DEOC) (No. 0389-2317717) ah te a rang thei ang berin an hrilh hre tur a ni a. Thuneitute lo thlen hma pawhin Village Level Disaster Management Committee/ Local Level Disaster Management Committee ten chhanchhuahna hna thawktute ni lo chu tlawhpawh theih loh turin an lo dang hrang (cordone) thin tur a ni.