2773/2022-2023
Champhai, the 23rd November, 2022: Mizoram University (MZU) atanga Expert Team lokalte chuan vawiin khan Govt. Champhai College-ah Subject Affiliation Inspection an nei a; endikna hi tluang leh hlawhtling taka neih a ni.

Expert Team-te hian Department chan insemin endikna an nei a. Dr. Zoramdinthara'n Mizo leh English Department a endik a, Prof. Rokendro Singh an Economics & Commerce Department, Prof. Zaithanzauva'n Physics leh Bachelor of Computer Application Department (BCA), Prof. Muthukumaran Chemistry leh Mathematics Department, Prof. HT Lalremsanga'n Zoology leh Botany Department-te a endik a ni.

Inspection Team-te hmaah hian Department hrang hrang te'n Power Point Presentation hmangin an Department dinhmunte tarlangin an sawifiah a; Zirtirtu leh Zirlai neih dante, Lehkhabu leh Laboratory hmanraw neih dante, result neih tawh dante leh Zirlaiin zirna sang zawk an chhunzawm dan leh hna an hmuh dante bakah Department hmasawnna leh thil pawimawh hrang hrangte an lo tarlang zel a, Inspection team-te pawh an lungawi thawkhat hlein a hriat a ni.

Inspection neih zawhah Exit Meeting neih chhunzawm nghal niin, thil pawimawh hrang hrang sawiho zui nghal a ni bawk a. Exit Meeting neih anih hnu hian Faculty Development Programme on Code of Professional Ethics chu College Seminar Hall-ah hman chhunzawm a ni a. Resource Person atan Prof. Lalbiakdiki Hnamte, Director, College Development Council, MZU chu hman niin hun hlawkthlak tak hmanho a ni.

Govt. Champhai College-ah hian Subject Permanent Affiliation neih tawh sa hi History, Geography, Education leh Political Science-te niin Subject dang 10 te hi Temporary Affiliation chauh a la ni a. Permanent Affiliation neih theih loh chhan lian ber pakhat chu Zirtirtu nghet thawk an tam tawk loh vang anih thu he hunah hian tarlan a ni a, Inspection neih anih hnu hian Subject thenkhatah chuan Permanent Affiliation hi neih belh theih ngei beisei a ni.

Govt. Champhai College hi August ni 6, 1971 a din niin NAAC accredited B++ a ni mek a, Science, Commerce, Arts leh BCA zirna an kalpui mek a ni.