2228/2024-2025

Aizawl, September ni 26, 2024: District Level Standing Committee on Rationalization of Polling Station chu Aizawl District chhunga polling station thar siam, hming thlak leh sawn tura rawtna awmte thlirhovin vawiin khan Aizawl DC conference hall-ah Addl. DC Pu Mark Lalthanliana hovin an thukhawm.

Committee chuan rawtna hrang hrang lute hi ngun taka sawihovin, rawtna a luh angin Election Commission of India in a pawm tura thawn an remti. Rawtna lut zingah hian Assembly constituency pahnih chhunga Polling Station awm sa then darh a P/S siam belh te,  Assembly Constituency paruk a Polling Station 11 te chhan hrang hrang avangin a hmun sawn ngai te bakah Polling Station, Part leh Section hming thlak te a tel a ni.

Dan ang chuan Polling Station khatah voter 1500 aia tam an awm chuan Polling Station dang siam belh theih a ni a. Polling Station hman lai thenkhat chu chhiatrupna avanga a building hman chhunzawm theih loh emaw, sak that a ngai avangin emaw voter te tan a pan rem zawk hmun danga a awm avanga thlak ngai an awm thin bawka ni.

Vawiin meeting-ah hian political party hrang hrang leh YMA, MHIP leh MUP aiawhte an tel a; SP Aizawl aiawh, ERO leh AERO te, School Education dept aiawh leh DIPRO te an tel bawk.