2229/2024-2025

Aizawl 26th September, 2024 : Pi Lalrinpuii, Tourism Minister hovin Tourist Lodge Conference Hall, Chaltlang-ah vawiin chawhma dar 11 khan World Tourism Day, tum 44-na hman a ni.

Khuallian Tourism Minister chuan kumin World Tourism Day thupui 'Tourism and Peace' tih chu kan ram mawina leh muanna nen a inhmeh hle thu sawiin ram ralmuangah chuan hmasawnna tha tak kan hmu thin a, kan ram pawh khualzinte hipna kawngah nasa zawka kan than theih a beisei thu a sawi. SASCI hnuaia tourism ruhrel siamna kawnga hmalak mek zel a nih thu sawiin kan hnam ziarang kan nunphung leh kan hnam chin than te zahpui lova, uar taka khawvel hmuha kan phochhuah a ngaih thu a sawi bawk.

MLA te chu an bial tinah khualzinte hip nan Homestay kalpui uar zel turin a chah a. Kan ram ngeiah Paragliding Pilot thahnem tak leh naupang kum 11 lek Pilot qualified kan nei thei chu lawmawm tiin khualzinte hip nan paragliding lam tihhmasawn tumin a department enkawl chuan hma a lak mek thu a sawi a. Khualzinte chu thliar hrang lovin vai an ni emaw sap an ni emaw kan hnampui an ni emaw tumah en hrang lova, kan sum hnar eizawnna min siamsaktu an nih angin hawihhawmna leh kawm nuam takin kan ram rawn tlawhtute chu lo hmachhawn thin turin kalkawmte chu a chah a. Tourism infrastructure lamah sang rih lo mah ila, a marketing lamah tan kan lak chuan khualzinte tun aia nasa-in kan ramah kan hip lut thei dawn a ni a ti.

Minister chuan nikum lamah Reiek khua-in best tourism village a lo dawng tawh chu lawmawm tiin kuminah pawh Sialsuk khua-in best tourism village 2024 a dawng thei chu a lawmpuiin lawmpuina a hlan nghal bawk a ni.

He hunah hian MLA 6 te'n Adopt Tourism Village atana an khaw thlan hrang hrangte an thlan chhan an sawifiah theuh a. Pu H. Ginzalal, Champhai North bialtu MLA chuan Hnahlan thlangin Pu Ramthanmawia, East Tuipui bialtu chuan Farkawn khua a thlang a. Pu Jeje Lalpekhlua, South Tuipui bialtu MLA chuan South Lungleng khua thlangin Pu Lalramliana Papuia, Lunglei South bialtu chuan Mamte khua a thlang a. Thorang bialtu MLA Pu R. Rohmingliana chuan Tuikawi khua thlang bawkin Pi Prova Chakma, West Tuipui bialtu MLA chuan Tlabung khua a thlang bawk a ni. Anni bakah hian Tourism Minister Pi Lalrinpuii pawhin Adopt Tourism Village atan Ralvawng khua a thlan chhan leh Tourism lama Potential a neih te a sawi lang ve bawk.

Vawiin hun hmanna-ah hian Pi R. Lalrinchhani, Deputy Director, Tourism Department kaihhruaina-in Tourism Excellence Award semna neih nghal a ni a. Category hrang hrang 12-ah heng mite hi Award dawngtute an ni.

1. Best Hotel- Hotel Regency, Zarkawt
2. Best Homestay - Zosang Homestay, Zotlang
3. Best Restaurant - La Ruby, Falkland
4. Best Tour Guide - C. Lalrinhlua, Electric Veng
5. Best Tour Operator - Riahrun Tours, Chaltlang
6. Best Travel Agent - D&L Travels, Chanmari
7. Best Stand Alone Catering - Hmingliani Catering, Mission Vengthlang
8. Best Yuva Tourism Club - Govt. Central Higher Secondary School, College Veng
9. Best Tourism Promoter - Zira PC, Thenzawl & Wild Traveller
10. Best City Bus - Vanlalhriatpuia, Driver, Lalhunliana, Conductor, MZ 01 T 3333
11. Best Taxi - Alex Laldinthara, MZ 01 N 2948, Chanmari Stand
12. Best Two Wheeler Taxi - C. Vanlalruata, ATWTA ID - 348

World Tourism Day thupui hi "Tourism & Peace" tih niin vawiin hun hmanna-ah hian Pi C. Ramsangzuali, Tourist Officer, Tourism Dept. kaihhruaiin Responsible Travel Pledge sawirualna neih a ni bawk.

World Tourism Day hmanna-ah hian Pi R. Lalrodingi, Director, Tourism Department chuan Day hmang tura kalkhawmte lawmna thu sawiin Pi Lalthakimi Pachuau, Jt. Director, Tourism Dept. chuan lawmthu sawina a nei bawk a ni.