2230/2024-2025

2024 Mimkut thla ni 26: Swachhata Hi Seva 2024 kalpui mekah vawiin khan Urban Development & Poverty Alleviation (UD&PA) Department, Lunglei leh Young Mizo Association (YMA) Theiriat Branch te chuan Theiriat CTU huam chhunga kawngpui kam hnim sam fai leh a paihna hmun ni lova bawlhhlawh paih then fai hnatlang an thawk.

Theiriat CTU hi Swachhata Hi Seva 2024 kalpui chhunga Lunglei khawpui huam chhung (urban area)-a vantlang hmunhma then fai ngai bik [cleanliness target unit (CTU)] ruahman pariat zinga pakhat a ni a. Hnatlangah hian Theiriat Branch YMA member-te leh UD&PA Lungleia thawktute mi 60 vel thawk chhuakin, hnim sam fai a, bawlhhlawh an then fai bakah, he lai hmuna kalte'n bawlhhlawh an paihna tur bawlhhlawh bawm an hung nghal a. Heti hian Swachhata Hi Seva 2024 kalpui chhung hian Lunglei khawpui huam chhunga CTU ruahman pariat zinga paruk - Zotlang CTU, Rahsi Veng CTU, Pukpui CTU, Ṭhuamluaia Mual CTU, Hrangchalkawn CTU leh Theiriat CTU-ah te faina hnatlang hi thawh tawh a ni.