2231/2024-2025

Aizawl, September ni 26, 2024: Vawiin chhun khan Power Minister Pu F. Rodingliana Office Chamber-ah Solar Rooftop Scheme PM Surya Ghar Muft Bijli Yojana chu chak zawka kalpui dan tur sawiho in P&E Dept Official-te leh Empanelled Vendor an thukhawm.

He meeting kaihruaitu Power Minister Pu F. Rodingliana chuan Mizoram sorkar in rooftop solar Kw 1 zelah Subsidy Rs. 12,000 pek a nih tur thu sawiin, 10 KW thleng installation ti duh tan he subsidy hi pek a ni dawn a ti a. He scheme hnuaiah hian Central Sorkar chuan Kw 3 thleng subsidy pek sak theiin, KW 1 zelah Rs. 33,000 subsidy a pe a. Hemi belhchhah nan hian State sorkar chuan subsidy hi a tum ve leh a ni. He scheme hmang tangkai duh, a tira senso tur sumlu neilo tan interest hniam tak in Bank Loan a lak theih dawn bawk a ni.

Meeting-ah hian zau zawk leh nasa zawka mipuite hnena he scheme zirtirna thehdarh dan tur sawiho niin, Department mai bakah vendor te chu scheme chungchang uar zawka mipuite hnena tlangzarh turin a rel a ni.

He Solar Rooftop Scheme hi India Prime Minister Pu Narendra Modi an February ni 29, 2024 a a tlangzarh niin, solar rooftop hmanga power tam zawk thar chhuahna tur leh mimal in (residential building) ten an kawlphetha mamawh an tharchhuah theihna tura ruahman a ni a.

Mizoramah chuan Power & Electricity Department (DISCOM) chu State Implementing Agency atan Central Ministry in a ruat a, Sorkar in tehfung hrang hrang paltlang Empanelled vendor a thlante hmangin mimal diltute hnenah solar rooftop installation hi tih sak tur a ni. Chenna in a vuah solar rooftop atanga energy siamchhuahte hi in neitute hman bak chu sorkar in unit khat Rs. 4.80 zelin a lei let sak dawn a ni. Tun thlengin Mizoram bikah Empanelled Vendor 11 an awm tawh a ni.