Vawiin chawhnu khan Aizawl DC's Conference Hall-ah Final Electoral Roll of Sinlung Hills Council, Aizawl District huam chhunga mi chu District Election Officer Pu Vanlalngaihsaka kaihruaina hnuaiah Pu John LT Sanga, Electoral Registration Officer, Sinlung Hills Council chuan mipuite en theih turin a tlangzarh.

Final Electoral Roll of Sinlung Hills Council  tlangzarhna hun kaihruaitu, District Election Officer Pu Vanlalngaihsaka chuan Sinlung Hills Council siam a nih hnua inthlanna hmasa ber buatsaih a ni tur chu thil lawmawm tak, Mizoram History a thil chhinchhiah tlak a ni tih a sawi a. He inthlanna buatsaih a nih theihna kawnga theihtawp chhuahtu official te leh tha taka lo tawiawmtu Sinlung Hills Council bial chhunga mipuite chungah lawmthu a sawi a. SHDC bial mipuite chu  Inthlanna thianghlim leh fel fai  neih a nih theih nan sawrkar thawhpuiah thawhpuiah a sawm a ni.

SHDC inthlanna atana hmalakdan report Pu Lalfakzuala, Election Officer, Aizawl District hnen atangin ngaihthlak a ni a. State Election Commission in Schedule of Roll Revision a siam bawhzuiin ni 05.09.2019 khan Draft Roll, 2019 chu 2016 VC  Roll behchhana siam a nih hnuah tarchhuah a ni a. Ni 12.09.2019 thlengin roll a dahluh, paih leh siamthat dilna hun hawn a nih hnuah vawiin khan Final Roll chu tarchhuah a ni ta a ni. SHDC, Aizawl District huam chhung bika Final Roll a vote awmzat chu 17,691 a ni a. Hei hi Draft Roll a vote awm zat 16,928 aiin vote 763 in a tam zawk a ni. Aizawl District chhunga SHDC huam chhungah hian Constituency 10 chhungah Khua/Veng 31 a awm a. Kolasib District-ah Constituency 2 chhungah Khua/Veng 4 awm bawkin SHDC huam chhungah hian Constituency 12 chhungah Khua 35 a awm a ni.