Tripura Bru Relief Camp atanga Lunglei District a Bru hruai kir tura ruat official ten Bru Repatriation thawh khatna hna tan turin  tukin zing dar 6:30 khan Lunglei an chhuahsan.

Liaison Officer tura ruat Lunglei Government College lecturer pali - Pu Zonunsanga Colney, Pu Lalthanmawia, Pu Z. Lalthanliana, Pu Lalhriattira Fanai te kaihhruaiin Supporting Staff mi sawm (10) leh Police pali (4) ten motor pali leh LPK pathum hmangin Mamit khua an pan mek. Tin, Bru repatriation buaipuia zin chhuak mek Pu Lalthakima Chhangte, Lunglei SDC (ic Bru repatriation) leh security supervisor tura ruat Lunglei Dy SP (Hqrs) Pu J. Rokima leh police ten Aizawl leh Mamit ah anlo hmuak ang. Repatriation thawh khatna atan hian Aizawl City Bus sawm leh pakua (19) hire a ni a. Lunglei District team hi official, supporting staff, security leh driver-te nen an zavaiin mi 71 an ni.

Bru Repatriation hna thawk tura zin chhuak te pual hian tukin zing dar 6 ah khan thlahna hun tawi Lunglei DC Office kawtzawlah hman a ni a. Lunglei DC Pi K. Lalrinzuali, SP Pu C. Lalthanmawia, CMO Dr Thani Pachuau, Sub Hqrs YMA President Pu Lalrotluanga leh a kaihhnawih official dangte an tel. Rev K. Zonunsanga’n hunserh hmangin tawngtaiin official-te hi thlah an ni.

Lunglei DC Pi K. Lalrinzuali chuan he hunah hian thu sawiin Bru repatriation tura ruat te chu ram pum huap hna pawimawh thawk tur an nih avangin an mawhphurna a san zia hre nawn turin a chah a. Repatriation hna a mawhphurna neite a bik takin Liaison Officer (LO) te chu uluk leh fimkhur taka hna an thawh a tul tur thu a sawi. An zinkawng a thui avang leh hmun thenkhatah kawng te duh anga a that tawk loh avangin fimkhur tak leh hmanhmawh lova kal tur leh mahni hriselna theuh ngai pawimawh turin a chah a ni. Repatriation hna kalpui naah zaidam leh dawhthei taka an mi hruai te enkawl turin a chah bawk a ni. Liaison Officer (LO) te chu a hmuna thil thleng pawimawh te rawn report zung zung tur leh harsatna an tawh palha thlen thuai tura chahin amah emaw SP leh official dangte engtiklai pawha phone a biak pawh theih an ni thu a hrilh.

Lunglei District ah hian Bru chhungkaw 364 an zavaiin mi 2051 hruaikir tur niin Khakchangpara camp atangin chhungkaw 3, Hamsapara Camp atangin chhungkaw 2,Naisingpara Camp atangin chhungkaw 54 leh Hazacherra camp atangin chhungkaw 305 an ni. Heng chhungkaw 364 te hi Lunglei District huam chhunga khaw pali- Putlungasih – chhungkaw 121, Chawilung S – chhungkaw 43, Dinthar – chhungkaw 187, leh Buknuam – chhungkaw 13 ah hruaikir an ni ang.

Lunglei District Bru hruai kir hna hi tun dinhmunah thawh nga (5 Batches)-a kalpui tura ruahman niin 1st Batch Repatriation hi 03/10/2019 (Thursday) ah Naisingpara Camp rawn chhuahsan-in 06/10/2019 (Sunday) ah an innghah lailawkna (temporary shelter) thlen pui beisei an ni. Repatriation thawh khatna ah hian Bru chhungkua 65, an zavaiin mi 408 hruai kir tura ruahmanna siam a ni a. Hengte hi Hazacherra Camp atangin chhungkaw 6 (mi 37), Naisingpara Camp Atangin chhungkaw 54 (mi 342), Khakchangpara Camp atangin chhungkaw 3 (mi 21), leh Hamsapara Campa atangin chhungkaw 2 (mi 8) te an ni. Ruahmanna siam dan chuan 03/10/2019 (Thursday) hian Relief Camp chhuahsanin Luangpawl, Mamit District ah an riak anga, a tuk 04/10/2019 (Friday) hian Lungverh panin PTC Lungverh, Aizawl District ah an riak ang. 05/10/2019 (Saturday) ah Lunglei District pana rawn chhuakin Luangmawl (2nd Bn MAP Hqrs), Lunglei District ah riakin a tuk 06/10/2019 (Sunday) hian an innghah lailawkna (temporary shelter) thlen pui tum an ni. 2nd Bn MAP Hqrs ah hian Lunglei Chief Medical Officer leh team ten Mobile Medical Unit an hawng dawn a ni.