Kolasib District huam chhung Sinlung Hills Council Area a chengte khaikhawmna Final Electoral Roll chu vawiin khan Kolasib DEO Pu Zoengsanga’n a tlangzarh. 

DEO chuan Final Electoral Roll tlangzarh thei tura mahni hna hlenchhuaktu Election Branch a thawkte inpekna chu fakawm a tih thu a sawi a, Roll buatsaih hi thil namai lo tak ani a, a hun taka Roll tlangzarh thei ani chu thil lawmawm tak ani a ti. DEO chuan Sinlung Hills Council Electoral Roll a chuang thei te chu India khua leh tui Scheduled Tribe chauh an nih thu sawiin he huna Roll tlangzarh hi Sinlung Hills Council hnuaia Electoral Roll buatsaih leh tlangzarh vawikhatna/hmasa ber a nih thu a tarlnag bawk.

Kolasib District huam chhungah Sinlung Hills Council hian Constituency pahnih (2) (11-Saipum leh 12-Saiphai constituency) a nei a (Mizoram ah Constituency 12 a awm/nei), 11-Saipum Constituency ah mipa 902, hmeichhia 896, Total 1798; 12-Saiphai Constituency ah mipa 1112, Hmeichhia 1085, Total 2197 an awm a. Kolasib District a cheng Sinlung Hills Council a Vote nei chu mipa 2014, Hmeichhia 1981 an vaiin mi 3995 an ni a, inthlan hi November thla a buatsaih theih beisei a ni.

He hunah hian District Level Standing Committee member te an kalkhawm a, Political Party hrang hrang hruaitu te hnenah Roll hi semchhuah nghal a ni.