Vawiin khan Secretariat Conference Hall, New Capital Complex ah Tripura-a refugee camp paruk atanga Mizoram Bru te hruaikir dan tur chungchanga Mizoram Sorkar ruahmanna leh inbuatsaih dan te thlir hoin Political Party leh NGO hruaitute an thu khawm a, he hun hi Pu Lalchamliana, Home Minister in kaihruaiin Pu Lalbiakzama, Secretary leh Home department a Official pawimawh ten an tel pui bawk a ni.

Pu Lalbiakzama, Secretary, Home department in Mizoram Sorkar in Bru hruai kir tura hun rei tak ata hma a lo lak tawh dan te leh tun tuma Sorkar inbuatsaih dan te a sawifiah a. Mizoram Bru te hruai kir tur hian kum 2016 khan identification neiin chhungkaw 5407 chhinchhiah an lo ni tawh a; chung zingah chuan chhungkaw 39 lo kir tawh a ni. Kuminah 2nd Phase Identification nei lehin chhungkaw chhinchhiah tawhte pawh Mizorama kir duh ngei te in report tura ngen an ni a, chutianga rawn inlan thei te atang chuan chhungkaw 4410 chhinchhiah an ni a, heng te hruai kir tur hian chak takin Sorkar a inbuatsaih a ni. Mizoram Bru te hruaikir tura senso mamawh pawh Ministry of Home Affairs ah thlen nghal niin Rs. vaibelchhe 100 chu Mizoram Sorkarin a dawng tawh a ni.

Mizorama Bru lo kir te awmna tur Lunglei, Kolasib leh Mamit district a Deputy Commissioner te pawhin Bru te lo haw dan tur leh Mizorama an inbenbelna tur ruahmanna an siam fel vek tawh a. Bru hruai kir hna hi 3rd Oct, 2019 ah tan tun a ni a, November thla chhunga hruai zawh hman turn a ni.

Meeting-ah hian member ten Mizorama Bru te chu tun tumah hian lo kir ngei se an duh tih an sawi a. He hruai kir hna thawk tura Sorkar leh NGO te lungrual taka an thawh tlan theih avangin boruak a thain a lawmawm tih sawiin, Mizoram khua leh tui dik tak te an lo haw ngei theihna turin theihtawp chhuah tlan zel tha an ti a. Mizorama an rawn haw na tur khua leh mipuite pawhin rilru inhawng taka lo lawma lo buaipui turin an ngen a ni.