Ni hnih awh tur Village Council Conference cum Panchayati Sammelan chu Aizawl District tan vawiin khan Synod Conference Centre-ah he huna khuallian Minister for Home, Rural Development, etc. Pu R. Lalzirliana chuan a hawng. LAD Minister Pu P.C. Lalthanliana chu he hunah hian khualzahawm a ni a, Aizawl District chhunga V/C hna thawk tha thlan chhuah pathumte hnenah lawmman sem nghal a ni.
Minister Pu R. Lalzirliana chuan sorkarin ram hmasawn leh changkanna atana ruahmanna a siamte tihlawhtling tura Village Council pawimawh thu leh, an mawhphurhna an hlenchhuah theih nan thawhhona tha neih a tul thu a sawi a. Village Council member-te chu khawtlang mipuiin mi rintlak leh rawntlak a an ngaih an thlan tlin an nih angin, ngaihtuahna leh rilru sukthlek dan pawh a tha lama an hruai theih thu a sawi. Hmasawnna chuan hmuh theih thil siamchhuah tha leh ropui tak tak piah lamah thinlung a tel thu sawiin Home Minister chuan faina leh thianghlimna kawngah te pawh tan la zual zel tura V/C hrang hrang kalkhawmte chu a chah a; an hnathawh dan leh thildangah pawh midang tana entawntlak nih tum zel turin a fuih bawk.
Minister Pu PC Lalthanliana chuan khawtlang roreltu mawhphurhna pawimawh tak tak neitute tan hma an sawn lehzual na tur inzirtirna hun buatsaih a ni chu lawmawm a tih thu leh, rah tha a chhuah ngei a rin thu a sawi a. Ruahmanna leh hmalakna reng reng chu a bulthut a fuh loh chuan a ziktluak theilo a ni tiin, Sorkar inrelbawlnaah pawh hmasawnna tha tak ruahman thin ni mahse a hlawhtlinna chu a bulthut, V/C level-ah a innghah thu a sawi. LAD Minister hian V/C te chuan khawtlang mamawhna te an hrechiang a, sum leh pai an dawn mil a hnathawh piah lamah khawtlang inawpdan felfai leh tha chherchhuah kawngah hma la bawk tura a duh thu a sawi a. V/C te mawhphurhna a len zel rual in, hna tam zawk pek tlak an nihzia an lanchhuahtir a tul thu te leh, tun dinhmun aia dinhmun sang zawng leh changkang zawka inhlanchhoh tum zel turin Minister hian kalkhawmte a chah a ni.
Aizawl District chhunga Village Council zawng zawng tan conference hi sorkar laipuia Ministry of Panchayati Raj-in RGSA (Rashtriya Gram Swaraj Abhiyan) scheme hnuaia Mizorama State Institute of Rural Development & Panchayati Raj kaltlanga sum a bultum niin, Local Administration Department nen tangkawpa buatsaih a ni a. District tinah he Conference hi buatsaih leh zel tur a ni. Aizawl Disitrct chhunga Village Council thawktha thlanchhuahte chu – pakhatnaah Maubuang V/C, pahnihnaah Darlawng V/C, leh pathumnaah Rulchawm V/C te an ni a. Estimate zulzuia hna an thawh dan te, account bu leh assets an vawn felfai dan te, faina lama khawtlang hmasawn dan te, khawtlang inrelbawl dan te leh thawhhona that leh thatloh bakah RFD te tehfung atan hmanga endik an ni. V/C tin ten an bial chhunga hnathawh leh hmalaknate chu display board-ah vawiin hian tarchhuah a ni bawk.
Vawiin hun hi Pu Rodney L. Ralte, Secretary, LAD chuan kaihruaiin, Pi Maria CT Zuali, Director, SIRD&PR chuan lawmthu sawiin chawhma hun a khar a. Chawhnu lam chu technical session a chhunzawm niin, SIRD&PR leh Zoram Law Consultancy atanga mithiam ten thupui hrang hrang hmangin zirtirna an pe a ni.
