Vawiin chawhnu khan Directorate of Food, Civil Supplies & Consumer Affairs (FCS&CA) Conference Hall-ah Law and Judicial Minister Pu Lalsawta chuan ‘Mipui Chanvo’ lehkhabu, Pu Lallunghnema ziak chu a tlangzarh.

Minister Pu Lalsawta chuan ‘Mipui Chanvo’ tih lehkhabu-ah consumer-te tangkaipui leh hlawkpui tur a tam thu sawiin mipuiten a taka an hman theih tur lehkhabu a nih thu a sawi a. Tun hma a mipui lam ngaihtuah lova hnathawh a nih dan sawiin tun dinhmunah chuan hma kan sawn a, Redressal Court thlengin kan nei tawh a ni, a ti a. Ram changkang, consumer an chakna hmun ngaihtuah erawh chuan hmabak kan la ngah thu a sawi a. Consumer-te chanpualah hian mipui kan harhchhuah a tul a ni tiin kan dikna kan hriatchian a pawimawh a ni, a ti a. Khawtlang nun tha nei tur chuan diklohna thailang ngamtu kan nih a ngai a, hetianga ti thinte chu mi chhuanawm an ni, a ti bawk. Consumer Protection Act 1986 chu Act hlui a ni tawh a, tun dinhmuna mipuiin consumer kan nihdan pawh a danglam tawh a ni, a ti a. ‘Mipui Chanvo’ lehkhabu chu mipuiten tangkai taka an hman a beisei thu a sawi bawk a ni.

Mizoram Consumer’s Union General Secretary Prof. Chawngsailova chuan programme a kaihruai a. Lehkhabu preview-na Zozam Times Editor Pu Malsawmpuia Ralte chuan a nei a. FCS&CA Secretary Pu H.L. Rochungnunga, IAS chuan thu a sawi bawk a. He hunah hian FCS&SA Department, Law and Judicial Department, Legal Metrology Department, Mizo Fed, Traffic, I & PR leh Consumer Rights Activist-te an tel a ni.