1589/2023-2024

Aizawl, 21.08.2023: Vawiin chawhnu khan District AIDS Prevention Control Committee (DAPCC), Aizawl District chu Chairperson Pi Nazuk Kumar IAS, Deputy Commissioner kaihhruaina in DC Conference Hall Aizawl ah an thukhawm a. Report ngaihthlak bakah Red Ribbon Quiz Competition buatsaih chungchang leh rel tur pawimawh dangte an rel.

Meeting-ah hian DAPCC meeting hnuhnung ber, November ni 15, 2022- in awareness campaign neih thu a rel bawhzui dan hrang hrang ngaihthlak a ni a. Hemi bakah hian HIV/AIDS dinhmun report thlirho a ni bawk. Aizawl District chhunga School hrang hrang (Class 8, 9 leh 11 zirlai) te HIV/AIDS chungchanga intihsiakna Red Ribbon quiz neih tur sawi ho a ni. Red Ribbon quiz competition hi National level thlenga intihsiakna neih turin National AIDS Control Organisation chuan a buatsaih a. District, State, Regional level intihsiakna atanga pakhatna te hi India Ram pum intihsiakna ah Mizoram aiawh a tel tura thlan an ni ang.

Meeting ah hian Aizawl District huam chhunaga HIV/AIDS dinhmun tarlan a ni, thalai naupang zawk te zingah (kum 15 - 35) HIV hmuhchhuah an pung zel a, HIV/AIDS kailo tura nun dan tha leh thianghlim inzirtirna neih tam a pawimawh thu sawi a ni. Mipat hmeichhiatna atanga hrik inkaichhawng a la tam ber thu te, hetihrual hian mipa mahni anpui kawp avanga hri kai an pun chhoh zel thu leh, parent to child transmission erawhin tlem lam a pan loh thu te report a ni.

Vawiin meeting-ah hian Vertical Transmission of HIV & Syphilis (EVTHS) chungchang leh he hmalakna hnuaia hmeichhia leh naupangte HIV leh Syphilis (Saihri) laka an fihlim theihna tura ruahmanna siam leh kalpui dan te report pek a ni bawk.