No.2317/2021-2022

Aizawl, 23rd September, 2021 : Vawiin khan Aizawl District Disaster Management Authority(ADDMA) chu Chairman Dr.Lalhriatzuali Ralte IAS, Deputy Commissioner, Aizawl District hovin Planning & Programme Implementation conference hall-ah an thukhawm a. Covid-19 dona kawnga ADDMA hmalakna leh, khuarel chhiatna chungchanga ADDMA huang chin leh mawhphurhna te an sawiho a ni.

Meeting ah hian ADDMA a tel sawrkar department hrang hrang ten Aizawl District huam chhunga covid hripui dona leh khuarel chhiatna hrang hrang laka tuarna tinep tura ruahmanna an kalpui dan te, an harsatna neih te leh an kut tichak tura mamawh an neih te an sawi khawm a. Department hrang hrang ten a huhova hmalak pawimawhna te, ruahmanna leh senso inkal thuah a awm lohna tura Project Appraisal Committee din chungchang te ngaihtuah ho a ni a. Mitigation Fund atanga Aizawl khawpui leh a chhehvela hmalakna tura ADDMA in ruahmanna 7 a siamte chu thlirho a ni bawk.

Meeting kaihruaitu D.C chuan Covid-19 hripui leng mek chu tuna Mizoramin chhiatna a tawh zinga lian ber a ni, tiin he hripui dona kawnga ADDMA hmalakna ah department hrang hrang te inpekna leh tanrualna chu lawmawm a tih thu a sawi a. ADDMA din a nih dan leh a mawhphurhna te, member department te thawhhona tur chungchang te tarlangin hripui dona kawngah leh khuarel chhiatna lakah pawh department hrang hrang te hmalakna zai khata a luan khawm a pawimawh hle a ni, a ti a. Veng tinah leimin, lei tawlh leh lei tlahniam awmna chhan tam ber chu tuidawn leh tuiluankawr awm that loh vang a ni tiin hemi kawngah hian nasa zawka mipui inzirtir a tul thu a sawi a. Leimin leh lei tawlhna hmunah sawrkar kut nghak mai lova mipui ten chhiatna nasa zawk laka inveng tura hma an lo lak ve thin chu a tangkai hle a ni, a ti. Pi Lalhriatzuali chuan hripui laka invenna tura Sawrkar in SOP a duan te leh Covid Appropriate Behavior te tha taka zawm chungin hrivei te nena lo awmho palh emaw, hnaivaia hrivei an lo awm palh a nih pawhin chi-ai lo tura mipui inzirtir a pawimawh hle a ni, a ti bawk.

Vawiina meeting ah hian DM&R Department kalphung leh a hmalakna hrang hrangte, Ministry of Home Affairs atanga Disaster mitigation fund hmuh dan leh pek chhuah dan phung te Pu John.L.T.Sanga, Director, DM&R chuan a sawifiah a. ADDMA-a member department hrang hrang aiawhte, Zonal Officers te leh Disaster Management Coordinator te bakah P&E department leh AMC aiawh te an tel a ni.