Election Commission ofIndiathupek anga Mizoram puma Photo Electoral Rolls Special Summary Revision 2014 Final Electoral Rolls chu peih fel niin vawiin chhun khan Addl.D.C. Pu Lalchungnunga hovin DEO Office Chamber ah Aizawl District Final Electoral Rolls 2014 chu tlangzarh a ni.
Aizawl District ah Assembly Constituency 14 a awm a, Draft Photo Electoral Rolls chu ni 16.12.2013 khan mipui en theih turin tarchhuah a ni a, hemi ni atang hian ni 31.12.2013 thleng Electoral Roll atanga paih ngaite paih dilna leh kum tling thar leh Electoral Roll-a la chuang lo hrim hrim te leh siamthat ngai te tan dilna hun hawn a ni. Ni 16 - 31.12.2013 chhunga Electoral Roll-a inthun luh dil te, paih ngai paih tur te leh hming siamthat ngai te dilna lut chu ni 3 - 10.1.2014 chhungin ERO/AERO te kaihhruaina hnuaiah Veng / Khaw tina Local Council, VC, NGO leh BLO ten an enfiah a. Hetianga enfiah tawh ERO / AERO ten an thehluh te chu Election Branch-in a enfel leh a, hemi hnu hian Data entry (Computer-a thunluh hna) thawh zui nghal a ni.
He Special Summary Revision chhung hian, Computer software hmanga chhui chhuah, hming awm nawn te chu enfiah a ni a. Aizawl District chhunga hming awm nawn leh Aizawl District leh District danga hming awm nawn mi 5283 hmuh chhuah zingah hming 1522 chu paih an ni.
Election Commission of India ruahmanna angin Final Electoral Rolls hi soft copy @Rs 100 /- leh a hard copy phek 1 @Rs 5 /- zelin a duh apiang tan lei theih a ni.
Final Electoral Rolls 2014 atanga thil chhinchhiahtlak deuh te :-
1. Electors tlemna ber : 7/5-Upper Sakawrdai leh 7/25-Chhanchhuahna Polling Stations (104 Electors)
2. Electors tamna ber : 13/18-Zemabawk III (1213 Electors)
3. Elector tlemna ber Constituency : 9-Tawi(ST)A.C. (14665)
4. Elector tamna ber Constituency : 19-Aizawl South II(ST)A.C. (21342)
5. Aizawl District ah hian Voters 260427 awmin mipa 124834 leh hmeichhia 135593 an ni a, mipa aia hmeichhia tamna chu 10759 a ni. Tin, Service Voters hi 1802 an awm bawk.
6. Aizawl District pumpuiah EPIC 100% neih a ni.
7. Aizawl District ah hian Supervisors 31 leh BLO 323 an awm.
8. Aizawl District huam chhunga Assembly Constituency 14 ah hian Polling Station 323 a awm a, chawhrualin Polling Station pakhat zelah Elector 806.27 awm ang an ni.
Final Electoral Roll tlangzarhna kaihruaitu Pu Lalchungnunga chuan Electoral Roll chu thil pawimawh, uluk taka buatsaih ngai a nih thu leh Mizote hunpui Krismas vuakvet laia thawh chhoh a nih thu te a sawifiah a, Special Summary Revision of Photo Electoral Rolls 2014 tluang tak leh hlawhtling taka neih a nih theih nana mawhphurtu ERO, AERO, Local Council, Village Council, Political parties, BLO leh NGO hrang hrang leh thu thar thehdarhtu te hnenah lawmthu a sawi bawk.
Vawiina Final Electoral Rolls 2014 tlangzarhna ah hian District Level Standing Committee member te - ERO, AERO, SP Aizawl, Political Parties, CYMA, MUP, MHIP, MZP, MJA, Local Council Association bakah School Education leh I&PR Department aiawh te an kal a ni.
