District chhunga khawpui a cheng zawng zawng ten mahni puala chenna in an neih theihna tura Sorkar laipui hmalakna Pradhan Mantri Awas Yojana (PMAY) - Housing For All (Urban) chungchang ngaihtuahin vawiin chawhnu khan Aizawl District Screening Committee on PMAY - HFA (Urban) chu NIB Conference Hall-ah UD&PA Minister Pu Zodintluanga hovin an thukhawm a. Screening Committee hian Aizawl khawpui a Ward hrang hrang atangin khawsak harsa chhungkaw 4515 tan insak tanpuina an dilna chu a pawm a ni.
Vawiin Screening Committee meeting hi UD&PA Director Pu Zorammuana’n a kaihruai a. Members kalte chu : Minister Pu R.Romawia, MLA Aizawl N-I; Minister Pu Lal Thanzara MLA Azl North-III, Pu Thanliana Azl North-I, Pu Lalruatkima, MLA Aizawl West II, Pu Vanlalzawma, MLA Aizawl West III, Pu PC. Lalhminghtanga, AMC Mayor bakah UCO Bank, Mizoram Rural Bank, Apex Bank, Bank of India, Canara Bank, HUDCO hotute leh UD&PA Department a hotute leh thawktu dangte an tel a ni.
UD&PA Minister chuan khawpui hmasawnna atan leh mirethei te chawikang tura UD&PA hnathawh hrang hrangte tarlangin, Sorkar laipuiin mi harsa zawkten mahni pual chenna in an nei theihnan hmalakna a rawn duan tan tirh atangin India rama kalpui tha ber nih tuma nasa taka Department in hma a lak thu a sawi a. PMAY-HFA tanpuina dilna lakkhawm leh enfiahna (data collection leh verification)-te pawh Specialist ten uluk leh chik taka a hmuna vak kualin an thawhchhhuah hnu ah a dawng awm tak tak chauh ‘computerised selection’-in tanpuina hi pek an nih thu a sawi a. Aizawl District chhungkaw heti zatin chenna in an sa thei tur chu thil lawmawm tak anih thu a sawi a. Tanpuina dawngtute hian pawisa hi V/C emaw L/C te hriatpuina in bank kaltlanga cheque an draw a ngaih tur thu leh, an hmalakna te hi thlalak nen finfiahna a khat tawkin an thehlut zel tur thu te bakah, hma la tak tak lo te chu tanpuina hi pek chhunzawm an nih loh tur thu te a tarlang a ni.
Vawiin thutkhawmah hian Verification kalpui anih dan te sawifiah niin, Aizawl District chhunga Census Town pathum – Darlawn, Sairang leh Saitual te chu Census Town te PMAY-HFA (Urban) hnuaiah telh phal an nih angin heng khua atanga dilna te enfiahna bawhzuia Door to Door Verification neih chu Committee hian a remti bawk a ni.
