3623/2024-2025

19th December, 2024 : Mipuite kan him tlan zawk nan leh Krismas leh Kumthar boruak tha tak hnuaia kan hman theih nan Aizawl District Police chuan dan leh thupek ken kawh hna ngawrh takin a thawk mek a. Krismas leh Kumthar vuakvet a halpuah leh halmawi zawrh leh hal hi sawrkarin a khap tlat a. Dan bawhchhiate chu section 223 BNS hnuaiah kumkhat thleng lung in tan emaw Rs.5,000/- thleng chawitir emaw, a pahnih a hrem kawp theih an ni.

Aizawl District hnuaia Police Station hrang hrangte chuan khapna thupek bawhzuiin theihtawp chhuahin halpuah leh halmawi zuar leh kawI dap hna a thawk mek a. Dawr, kudam leh lirthei hrang hrangte check thin an ni a, transport leh courier service-te pawh endik zel an ni bawk. Tin, online a zuar thinte pawh theih ang ang a chhuizui an ni bawk. Halpuah leh halmawi thahnem tak man tawh niin heng danin a khap thil man tawh zawng zawng hlut zawng hi Rs. 21,35,555/- man hu a ni. Tin, thubuai pasarih (7) ziahluh tawh niin mi pasarih (7) man an ni a. Jail-ah dahluh vek an ni.

Aizawl Police-te chuan sawrkarin khapna thupek a chhuahte zawm theuh turin mipuite kan ngen a. Halpuah leh halmawi hal hi mihring hriselna atan a that loh mai bakah, kan ranvulh tamtak thihpui thin a nih avangin mipuiten kan tan a sawrkar thupekte zawm theuh a Police-te dan leh thupek kenkawh kawngah thawhpui turin kan sawm a ni.

Halpuah hal vanga harsatna tawk leh halpuah a rem theih nan a veitu tamtak kan awm tih kan hriat in a thlamuan thlak kan ti a, hnuchhui kawng a Police-te tha tichak tur a pui duh te tan, dan bawhchhe lai thlalak emaw video record emaw a hnuai a phone number tarlanah hian Whatsapp a thawn emaw tawngkam a report pek theih a ni:

Aizawl khawpui chhunga veng hrang hrangah ni 21.12.2024 atangin Police-te zanah kan duty dawn a. Tin, a tul huna rang tak a che chhuak thei tur Quick Response Team (QRT) atan Aizawl khawpui a Police Station hrang hrang pali (4) ah Police dahbelh an ni ang. Heng bakah hian Police patrolling tihchak a ni bawk dawn a ni. Krismas leh Kumthar vuakvet a bazaar kal harsatna tawkte tanpui turin Israel Point, Bara Bazaar leh V. Lalliana Point, Lower Zarkawtah te Police Help Desk siam a ni bawk ang.

Tin, lirthei khalhtute dan zawm a, mipui himna tana hlauhawm leh harsatna siam lo turin a ngen a. Zu leh ruihtheihthil dang rui chunga lirthei khalh lo turin a ngen bawk. Khawlaia rui chunga lirthei khalhte endik a ni dawn a. hmun hrang hrangah barricade siamin Police Duty dah an ni ang. Zu vanga harsatna tamtak thleng thei a nih avangin, rui chung a buaina siam leh a zuar man kan awm a nih chuan, dan anga hrem zel kan ni ang. Function leh Programme buatsaihtute pawh mipui kea kalte himna ngaihtuah chung leh motor tlan tibuai lo zawng a hmun remchangah function leh programme buatsaih hram turin a ngen bawk a ni.

Aizawl khawpui chhungah Krismas Ieh Kumthar boruak tha taka hman a nih theih nan leh mipuite kan him theih nan Mizoram Police chuan tlawmngai pawlte nen thawhhona tha tak hnuaiah hma nasa takin a Ia a, khawpui chhunga tlawmngai pawl branch hrang hrangte nen halpuah leh halmawi khapna thupek kenkawh kawngah kan thawkho zel dawn a ni.