Vawiin khan Aizawl District Vigilance & Monitoring Committee chu an Chairman Pu C.L.Ruala, MP (Lok Sabha) hovin DRDA Conference Hall-ah an thukhawm a, Rural Development hnuaiah sorkar hmalakna kalpui mekte an thlirho. He meeting-ah hian RD Minister Pu R.Lalzirliana, Dy. Speaker Pu R.Lalrinawma, Parliamentary Secretary Pu K.S.Thanga  leh MLA Dr.Ngurdingliana te pawh an tel ve.

Chairman Pu C.L.Ruala chuan National Level Monitoring Report-ah Aizawl District chu kawng thenkhatah ti tha hle angin a lang chu a lawmawm hle a, a kaihhnawih department leh thawktute chu an hnathawh that chhunzawm zel turin leh tan la sauh sauh turin a fuih a. RD Minister Pu R.Lalzirliana pawhin thu sawiin MP 2 ten District tina sorkar hmalaknate hneh taka an vil thin leh sawiselna lai an hmuhte pawh tlang taka sorkar fuih nan an hman thin chu a lawmawm hle a ni, a ti a. MGNREGS hnuaiah chak taka hmalak a ni mek a, inhlawhna pawh ni 30 bituk a nih laiin ni 70 lai inhlawhna siam sak an ni chu a fakawm hle a; MGNREGS hnuaia hnathawhte hi mipui leh khawtlang tan rotling tur thil siam nan hman nise, a ti bawk. District thenkhatah National Land Records Modernisation Programme (NLRMP) kaltlangin ram chinfel hna thawh mek a nih thu leh District zawng zawgah he Programme hi kalpui tum a nih thu a tarlang bawk.

Pradhan Mantri Gram Sadak Yojana (PMGSY) hnuaiah kum 2015-March 2016 chhungah sum hman tur zat awm chu Rs.6452.74 crores niin hnathawh nan Rs.4108.76 crores a ni a, hnathawh dan chu :

Darlawn Block chhunga Sakawrdai - Zohmun kawng siamtu contractor chuan a hna a zawh theih loh avangin ban a ni a, tender thar koh leh niin tunah hian contractor dangin hna an khawih zawm mek tih PWD Department-in an tarlang bawk a ni.

National Rural Drinking Water Programme (NRDWP) hnuaiah kum 2015-May 2016 chhungin sorkar laipuiin Rs.20 lakhs a pek atangin Daido (Darlawn Block)-ah hnathawh zawhfel a nih thu PHE Department-in an tarlang a. Swachh Bharat Mission (Gramin) hnuaiah May, 2016 thlengin IHHL 1056 sak zawh tawh a ni a, Aizawl District chu Phase-I ah a tel avangin theihtawpin hna kalpui mek a ni a, kuminah Aizwl District chu ‘Open Defaecation Free’ (ODF) puan ngei tum a ni bawk.

Vawiin meeting-ah hian ST Students te tana hamthatna lam Scholarship leh Upgradation of Merit chungchang te, National Social Assistance Programme (NSAP), Hostel sak te, Vocational Training for Tribal Areas te, IAY, IWMP leh MGNREGS hnuaia hmalakna te pawh thlirho a ni.